Saturday 23 June 2012

'A' Cake

என் குட்டித் தோழி ஏஞ்சல் பிறந்தநாளுக்காக ஜனவரியில் செய்த கேக் இது. இப்போதான் வெளியிட நேரம் அமைந்தது.

செய்முறை விளக்கம் இங்கே -> http://www.arusuvai.com/tamil/node/23061

Sunday 17 June 2012

மனமுண்டானால்...

"ச்சிப்! ச்சிப்! ஹாய்ய்ய்!"
எல்லாருக்கும் பாங்க்ல, ஹௌசிங் லோன் குடுக்கிறாங்கள். எங்களுக்கு மட்டும் தரமாட்டினமாம். ;( ஷூரிடி கேட்கினம்.
கதவடைப்பு சத்தியாக்கிரகம்; ம்... இவங்கட காசை இவங்களே வைச்சுக் கொள்ளட்டும் எண்டு, நாங்கள்.....
பாங்க் சுவரிலயே ஹௌஸ் கட்டியாச்சுது.
இப்ப....
எங்களுக்கு ரெண்டு பிள்ளைகளும் இருக்கினம். இனிமேல் பின் கதவைத் திறக்க முடியாது இவை."
~~~~~~~~~~~~
வங்கி பின்புறம் வாகனத்தை நிறுத்திவிட்டு க்றிஸ் உள்ளே போய்விட்டார். என் கவனத்தைக் கலைத்தது மெல்லிய "கீச்கீச்".
 தந்தை... மேலே உடலுலர்த்த... தாய்ப்பறவை பறந்து பறந்து இரை தேடிக் கொடுத்தது.

"பாங்க்ல களவு போனால் முதலில என்னைத்தான் பொலிஸ் தேடி வரும்," என்று க்றிஸ் சொன்னதைக் கவனிக்காமல் ஃபோட்டோ எடுத்து இருக்கிறன். ஒண்டும் ஆகாமல் இருக்கவேணும் எண்டு மன்றாடுங்கோ மக்கள். ;)

Saturday 9 June 2012

தட்டாமல் ஒரு தட்டு

வீட்டில் இடம் நெருக்கடியாகத் தோன்றிய ஒரு சமயம் ஒன்றாய் தொலைக்காட்சிப் பெட்டியும் இடறல் செய்ய... சுவரில் மாட்டுவதுபோல் ஒன்று வாங்கிவிட்டால் இடத்தை மிச்சம் பிடிக்கலாமென்று வாங்கி மாட்டியும் ஆகிற்று. மீதிப் பொருட்களை எங்கே வைப்பது என்று சிந்திக்க, மூத்தவர் கொடுத்த யோசனை, சுவரில் ஒரு தட்டு அடிக்கலாம் என்பது.
இது முன்னோட்டம்.
கிடைத்த பழைய கதவு ஒன்று. ;) வெண்மையாக இருந்தால் அழகாக இருக்குமா அல்லது 'வார்னிஷ்' பூச்சு அழகாக இருக்குமா!

தட்டு எந்த வடிவில் இருக்கவேண்டும் என்பது பற்றி ஆலோசனை நடந்தது. இறுதியாக வீட்டில் ஏற்கனவே செய்து வைத்திருந்த தேநீர் மேசைக்குப் பொருத்தமாக அமைப்பது என்று முடிவானது.
மேசை மேல் புதினத்தாளை விரித்து வைத்து வெளி வடிவத்தைப் பிரதி எடுத்தேன். பொருத்தமாக நீளத்தைச் சரிசெய்து கொடுத்தேன். பிறகு க்றிஸ் வேலையை ஆரம்பித்தார்.
பலகையை வெட்டி, முதல் முறை பூச்சுக் கொடுத்துக் காயவைத்தாயிற்று. வெள்ளைப் பலகையை எடுத்துவிட்டு சுவரில் இதை வைத்துப் பார்த்தோம். பிறகு இந்தச் சட்டம்...
பின்னால் உள்ள கம்பியை அழகாக மறைப்பதற்காக பொருத்தப்பட்டது.
எல்லாம் சீராக்கி, அரம் & அரத்தாள் கொண்டு தேய்த்து மீண்டும் பூச்சுப் பூசி மாட்டி இப்போ இப்படி இருக்கிறது. பலகைக்சுவர்; இடையே எங்கு மொத்தமான சட்டங்கள் இருக்கின்றன என்பதைக் கவனத்தில் வைத்தே தொலைக்காட்சிப் பெட்டியையும் தட்டையும் மாட்டவேண்டியிருந்தது. சரியாக நேராக மாட்ட இயலவில்லை. ;(
யாராவது எதையாவது கீழே போட்டு தட்டின் கீழ் குனிந்து நிமிர்ந்து... தலையில் தட்டிக்கொள்ளாமல் இருக்க... அதன் கீழ் இந்தக் குட்டித் தோட்டம்.

Tuesday 5 June 2012

எலிகள் தேவை!

புதிதாக வந்து இணைந்துள்ள அனைவருக்காகவும் இந்த இனிப்பு.... இங்கிருந்து -> http://mahikitchen.blogspot.co.nz/2012/05/blog-post.html

என் வருடாந்த இரத்தப் பரிசோதனைக்கான காலம் வந்தாயிற்று - நாளைக் காலை போவதாக இருந்தேன். இப்போ மனது மாறிவிட்டது. கொஞ்சம் முன்பாகத்தான் சந்தோஷமாக ரஸகுல்லா சாப்பிட்டிருக்கிறேன். ;) பரிசோதனை முடிவுகள் நிச்சயம் சரியானதாக இராது. எதற்கு வம்பு, நான்கு நாட்கள் கழித்தே போகலாம். ;))

நன்றி மகி. முன்னேறி இருக்கிறேனா!!

Friday 1 June 2012

க்விலிங்

நாட்குறிப்பிலிருந்து...  
 01/10/2009
குடும்ப நண்பர் ஒருவர் மகளைப் பார்க்கவென்று அவுஸ்திரேலியா பயணமாகிறார். நாளைக்காலை விமான நிலையத்தில் விட்டுவர வேண்டும். அவரது பேத்தியின் பிறந்தநாள் வருகிறது. ஏதாவது அன்பளிப்பு அனுப்ப வேண்டும் என்று ஆசை. அவர்களிடம் எல்லாமே இருக்கும். தவிர... கொண்டு செல்பவரிடம் இறுதி நேரம் கையில் கொடுத்தால்... சுமை + சுமக்க பையில் இடம் வேண்டும். சிரமம் கொடுக்க விரும்பவில்லை.

பணமாகவே அனுப்பலாம். க்றிஸ் பணம் மாற்றி வரப் போயிருக்கிறார். சட்டென்று நிமிடங்களில் எளிமையான இந்த வாழ்த்து அட்டையைத் தயார் செய்திருக்கிறேன்.

வெளித் தோற்றம்...
 உள்ளே.....
A4 அட்டையை மூன்றாக மடித்து... உட்புறம் வருமிடத்தில் பூ வரைந்து.... இதழ்களையும் இலையையும் வெட்டி நீக்கிவிட்டு... முன்னிரண்டு பகுதிகளையும் சேர்த்துப் பை போல ஒட்டியிருக்கிறேன். மேற்புறம் (வெளியே தெரியாதவாறு உட்பக்கமாக ) 'செல்லோடேப்' கொண்டு ஒட்டி இருக்கிறேன். 

பூனை உறங்குவது... பெயரின் மேலே. ;)
குழந்தை பெயர்... ஆ __ __ ;))