அழகாக இருக்கும் நீலத்தும்பி! :)

இந்த இடுகைக்கு முதலில் "பறக்க இயலாத் தும்பி" என்று தலைப்பிட்டிருந்தேன். //தலைப்பை கொஞ்சம் மாத்துங்களேன் டீச்சர்! டைட்டிலே நெகடிவ்வா இருக்கு! :- ]// என்று மகி கருத்துச் சொல்லி இருந்தார். அவர் வேண்டுகோளை ஏற்று, சொல்லப்பட்ட கருத்திலிருந்த ஒரு வரியிலிருந்து தெரிந்து இப்போது தலைப்பு வைத்திருக்கிறேன். ;)))
பிரதி திங்களும் 7ம் 8ம் வகுப்பு மாணவர்களுக்கு அவர்கள் homework Sheet கையில் கிடைக்கும். இப்போது homework என்பது home learning என்று பெயர் மாற்றம் பெற்றிருக்கிறது. 

முடிப்பதற்கு ஒரு வாரம் தவணை; மறு திங்களன்று அதிகாலை வகுப்பாசிரியரிடம் ஒப்படைக்க வேண்டும். ஒவ்வொரு மாணவரும் இந்த வேலைக்காக இரண்டு அப்பியாசப் புத்தகங்கள் வைத்திருப்பார்கள். ஒரு புத்தகம் திருத்தத்துக்காகக் கையளிக்கப்பட்டிருக்கும் அதே வேளை அடுத்த வார வேலைகளை அடுத்த புத்தகத்தில் செய்துகொண்டிருப்பார்கள்.

கொடுக்கப்படும் வேலைகள் அனேகம் அந்தந்தக் காலத்தின் நிகழ்வுகள் தொடர்பானதாக இருக்கும். ஒவ்வொரு வாரமும் நான்கு முதல் எட்டுக் கேள்விகள் வரை கொடுக்கப்படும். இவற்றில் தேடல்கள், ஆக்கவேலை, மனனம்செய்தல் என்று எல்லாவகை வேலைகளும் அடங்கும். 

கல்வியில் பின்தங்கிய நிலை மாணவர்களுக்கான வினாக்களும் இருக்கும்; வயதுக்குரிய அறிவுள்ளவர்களுக்கான வேலைகளும் இருக்கும்; தெரிவுப் பகுதியும் உண்டு. இறுதி வினா விசேட திறமையுள்ள மாணவர்களுக்கானது. இதைச் சிறப்பாக முடித்தால் சான்றிதழ் பெற்றுக்கொள்ளலாம்.

எது எப்படியாயினும் - படைப்புத் திருட்டு (plagiarism) ஏற்றுக்கொள்ளப்பட மாட்டாது. அதுபோல விபரங்களுக்கான ஆதாரங்கள் முடிந்தவரை கொடுக்கப்பட வேண்டும் என்கிற நிபந்தனையும் உண்டு.

சிறந்த வேலைகள் செய்திப்பலைகையில் அனைவர் பார்வைக்கும் வைக்கப்படும்.

இந்த வீட்டுக்கல்வி வேலைக்குப் புள்ளிகளும் உண்டு. தவணை இறுதியில் அதிக புள்ளிகளைப் பெற்றவர்களுக்குப் பரிசுகள் வழங்கப்படும்.  

சென்ற தவணை, இறுதி வாரத்துக்கான வீட்டுக்கல்வி பூச்சிகள் பற்றியதாகவிருந்தது. அறை எண் 16ல் ஒரு சின்னவர் செய்து வைத்திருந்த தும்பி என் கவனத்தைக் கவர்ந்தது. 

காலை இடைவேளையின் போது தும்பியை நான் பார்ப்பதற்காக மீண்டும் எடுத்ததும் கையில் ஆப்பிள், பழரசம், கிழங்குப்பொரி என்று அனுபவித்துச் சுவைத்துக் கொண்டிருந்த மாணவர்கள் அனைவரும் சூழ்ந்து கொண்டார்கள். எல்லோரும் பாராட்டிப் பேச தும்பியின் படைப்பாளரான ஃபிஜி - இந்திய மாணவருக்கு முகம் பூரித்துப் போயிற்று. 

"புகைப்படம் எடுத்துக் கொள்ளட்டுமா?" என்று கேட்டேன்; சம்மதித்தார். கைப்பையில் துளாவ.. ;( காணோம் கருவியை. "விடுமுறை முடிந்து வந்ததும் எடுத்துக் கொள்கிறேன்," என்றேன். 

மூன்றாம் தவணை ஆரம்பித்த அன்று மதியம் வந்து நின்றார், "தும்பியைப் புகைப்படம் எடுப்பதாகச் சொன்னீர்களே!" அன்றும் கையில் புகைப்படக்கருவி இல்லை. 

இன்று எடுத்து வந்தேன்.

கடதாசியைச் சுருட்டி செல்லோட்டேப் போட்டு ஒட்டி உடலை அமைத்திருந்தார். OHPsheet பயன்படுத்தி இறகு அமைத்து அதன் மெல்லிய ரேகைகளை marker கொண்டு வரைந்திருந்தார்.  

அந்த அறையில் தன் பெயர் எழுதிய ஓர் பலகைத் துண்டினை, இப் பறக்க இயலாத் தும்பி தன் கம்பிக் கால்களால் பற்றியபடி அழகாக நிற்கிறது.