பக் பக் பயணம்

வாழ்க்கையில்...
பயணங்களற்ற பொழுதுகள் பல
'பக் பக்' 'திக் திக்'
இப்படி இருக்க...
'பக் பக் பயணம்' என்று
எதைச் சொல்ல!
எதை விட!
மொத்த வாழ்க்கையுமே
பக் பக் பயணம்தானே!

 

கடக்கையில்...
திக்திக்!

இதுவும் கடந்து போகுமென்று,
பல் கடித்துக் கடந்து முடித்திட...
'அப்பாடா!
நிம்மதிப் பெருமூச்சு.

பெரிதாய்த் தெரிந்த,
முதல் வந்த 'பக் பக்',
அடுத்து வந்த பெரிதொன்றால்,
மனதின் ஓர் இருள் மூலையில்.
அடுத்து வந்தது...
அதையும் விடப் பெரிது.

பெரிதா!
பெரிதாய்த் தோன்றிற்றா!!!!

வருடா வருடம்
கோடையும் குளிரும்
தப்பாமல்...
தப்புத் தப்பாய் வருகிறது.
"போன வருடத்தை விட
இம்முறை கொடுமை!'
தப்பாது சொல்கிறோம் நாமும்.

சிந்தித்துப் பார்க்கிறேன்,
இவை,
வெறும் தோற்றம்தானோ!

கோடையில் விசிறிக் கொள்ளலாம்;
குளிரில் கம்பளி போர்த்தலாம்.
மறுவருடம் மறந்து
அதையே சொல்லலாம்,
"போன வருடத்தை விட
இம்முறை கொடுமை!'

பக்கென்றதெல்லாம்
பத்திரமாய் உறங்குகிறது.
உறக்கட்டும் நிம்மதியாய்
விழிக்கும் போது விழிக்கட்டும்.
நான்...
அதன் உறக்கம் கலைக்க வேண்டாம்
என் உறக்கம் தொலைக்க வேண்டாம்.

~~~~~~~~~~~~~
அழைப்புக்கு நன்றி ஆசியா
எவ்வளவோ முயன்றேன்
இயலவில்லை எழுத.

அதனால்... ;)