இமா காதில் 'வாஷர்'

'இமாவைக் காணவில்லை,' என்று ஏங்குவோருக்காக இந்த இடுகை. ;)
'காதில பூ' கேள்விப் பட்டிருப்பீங்க, இது காதில 'வாஷர்'. ;)

கீழுள்ள படத்தை வரைந்தது நான் அல்ல, என் சக ஆசிரிய நண்பர் ஒருவர்.
ஒரே ஒரு குறை, சிரிப்பைக் காணோம். ;(

வருடத்தின் முதலாம் வாரம் எங்கள் பாடசாலைக்கு வரும் ஏழாம் எட்டாம் ஆண்டு மாணவர்கள் அனைவருக்கும் இந்தப் பயிற்சி கிடைக்கும். அவரவர் படத்தை வரைந்து, இது போல் உணர்வுகளைக் காட்டும் குமிழ்களும் வரைந்து, அவ்வுணர்வுகளால் அவர்கள் ஆட்கொள்ளப் பட்டிருந்த தருணங்களை விபரிக்குமாறு கேட்கப்படுவார்கள்.
உதாரணத்துக்கு ஒரு படம் வரையலாம் என்று ஆரம்பித்த ஆசிரிய நண்பர் அச்சமயம் வகுப்பினுள் வேறு வேலையாக நின்றிருந்த என் முகத்தை வரைய ஆரம்பித்தார். சரியாகத்தான் வரைந்து இருக்கிறார். ;)

அணிந்திருக்கும் காதணியைப் பற்றிய கதை.

என் தந்தையாருக்கு தச்சு வேலை, மற்றும் பல்வேறு விடயங்களில் ஈடுபாடு உண்டு. எப்போதும் அதற்கேற்ற மாதிரியான பொருட்களை வாங்கிச் சேர்த்தபடி இருப்பார். செபா அம்மாவுக்கு நகைச்சுவை உணர்வு அதிகம், 'நல்லதுதான், திருமணத்தின் போது நகை நட்டு போடுவதற்குப் பதில் வாஷரும் நட்டுமாகப் போட்டு விடலாம்,' என்பார். ;)

இந்தக் காதணி பார்க்க வாஷர்களைக் கோர்த்தது போல் இருக்கவே பழைய நினைவுகள் வரவும் ஆசையாய் வாங்கி வந்தேன். :)

இவை இரண்டும் நியூசிலாந்து பாவா சிப்பிகளால் (paua shells) செய்யப்பட்ட வாஷர்கள். ;)