பாடசாலைக்காக

முதல் முறை என் பகுதியைச் சேர்ந்த நட்பு ஒருவரது பிரிவுபசாரத்திற்காக ஓர் வாழ்த்திதழ் செய்து கொடுத்திருந்தேன். அது நானாகவே விரும்பிச் செய்தது. அதைப் பார்த்து விட்டு பாடசாலை சார்பாக அனுப்பப்படும் வாழ்த்துச் செய்திகள், நன்றிச் செய்திகள், துயர் பகிர்வு என்று எதற்காக வேண்டுமானாலும் பயன்படுத்தக் கூடியதாக பன்னிரண்டு செய்து கொடுக்கக் கேட்டார்கள்.

முன்பே சொல்லிவிட்டேன், என்னால் ஒரே விதமாகச் செய்து கொடுக்க இயலாது, அப்படிச் செய்தால் சலிப்பு வரும்; கவனம் எடுத்து வேலை செய்ய இயலாது என்று. ஒவ்வொன்றும் ஒவ்வொரு மாதிரிச் செய்தால் பரவாயில்லை என்று சொன்னார்கள்.

அட்டை வாங்குவதிலும் பிரச்சினை இருந்தது. முன்பு 'லெதர் க்ரெய்ன்' அட்டைகள் (அனைத்தும் ஓர் அலுவலகத்திலிருந்து மீள்சுழற்சிக்காக என்னிடம் கொடுக்கப்பட்டவை.) பயன்படுத்தினேன். அவை வெகு அழகாக இருக்கும். பிற்பாடு எத்தனையோ கடைகள் ஏறி இறங்கியும் அவை கிடைக்கவில்லை. 'லெதர் க்ரெய்ன்' கடதாசிகள் இருக்கின்றன, அட்டைகள் எங்கும் இல்லை. அமேசனில் கிடைக்கும். குறைந்தது ஆயிரம் வாங்க வேண்டும். ஏற்கனவே உள்ள குப்பையைக் குறைக்க நினைத்துத்தான் இப்போ களம் இறங்கி இருக்கிறேன். மீண்டும் குப்பை சேர்த்தால் எப்படி! :-)

இங்கு பயன்படுத்தி இருப்பவை....
வெள்ளை - லெதர் க்ரெய்ன்

மீதி மூன்று நிறங்களும் 'லினன் க்ரெய்ன்' அட்டைகள்

பாடசாலை இலச்சினை - புத்தக அடையாள அட்டை ஒன்றிலிருந்து வெட்டியது.