பிடிக்காத பத்து

பிடித்த பத்துப் பின்னூட்டங்கள், பத்துப் பெண்கள்...
எனக்குப் பிடிக்காத பத்து என்று யாராவது கேட்டால் என் பதில் என்னவாக இருக்கும்!!

யோசித்துப் பார்ப்போம்...
1. கோழி.. உணவாக & அந்தச் சமையல் வாசனை.
2. மீன் கடை (வேறு வழி இல்லாவிட்டால் ஒழிய உள்நுழைய மாட்டேன்.)
3. உடைந்து / வெடித்து இருக்கும் கிண்ணத்தில் காப்பி, தேநீர் குடிக்க நேரிடும் சந்தர்ப்பங்கள். (கவனிக்காமல்தான் கொடுத்திருப்பார்கள், ஆனாலும் நெருடலாக & ஆரோக்கியக் குறைவாகத் தெரியும். கூடுமானவரை பேச்சு சுவாரசியத்தில்! குடிக்க மறந்து விடுவேன். ;)  )
4. வின்டரில் விசிடிங் போகும் இடத்தில் யாராவது மூக்கை மூக்கைத் துடைத்துக் கொண்டிருந்து விட்டு அதே கையால் அதுவும் கிண்ணத்தின் மேல் விளிம்பில் பிடித்துக் கையில் தேநீர் தருவது. (நான்  ஒரு போதும் தட்டு இல்லாமல் கையில் கொடுப்பது இல்லை. இச் சந்தர்ப்பங்களிலும் பேச்சு சுவாரசியத்தில் குடிக்க மறந்து போவேன். ;)  )
5. முன்னனுமதி இல்லாமல் என் தட்டில் "நல்லாச் சாப்பிடுங்க," என்று பரிமாறும் (அதுவும் கோழியை) அன்பு உபசாரம்.
6. வாசனைகள் அணிந்து, என்னருகே வந்து, என்னை மூச்சுத் திணற அடித்து இரும வைத்துவிட்டுக் கரிசனமாக இன்னும் நெருக்கமாக வந்து, ஆதரவாய் முதுகு வருடி, ஆஸ்மாவுக்கும் மருந்து!! சொல்லி என்னை மேலும் மூச்சுத் திணற அடிக்கும் அன்பு. (அப்பிடியே செத்துரலாம் மாதிரி இருக்கும்.) ;)
7. யாம் பெற்ற துன்பம் பெறுக இவ்வையகமும் என்று புகை பிடிப்போர்.

மீதி எல்லாம் தவிர்க்க இயலாவிடினும் பொறுத்துக் கொள்வேன். இவை மட்டும் முடிவதில்லை. ;)

எப்படிச் சிந்தித்தாலும் பத்து வரவில்லை. நல்ல விடயம். சந்தோஷமாக இருக்கிறது. பட்டியலை இன்னும் சிறிதாக்க இயலுமா என்று பார்க்க வேண்டும்.

முடியும் என்று நினைக்கிறீர்களா!! ;)