செல்லங்கள்

என் அயலார்

என் அயலார் பற்றி ஆல்பத்தில் ஜீனோ கொடுத்திருந்த கருத்தினைப் படித்ததில் இருந்து எல்லா அயலாரையும் பின் தொடர்கிறேன். :)

இதோ கருப்பாக இல்லாதோர் புகைப்படங்கள். விரைவில் நீர்வீழ்ச்சி சரி செய்யப்படவேண்டும். இல்லாவிட்டால் இங்கு ஒரு பூனைச் சரணாலயம் தன்னால் உருவாகிவிடும். மகனைக் கேட்டால் "அது பெரிய வேலை," என்கிறார். "அப்படியானால் அந்த அமைப்பை அகற்றிவிடலாமா?" என்றால் சந்தோஷமாகத் தலையாட்டிவிட்டுக் கூடவே "இதை எடுத்துவிட்டுப் பெரிதாக ஒன்று வைக்கலாம்' என்கிறார். இருப்பதையே பராமரிக்க வழியைக் காணோம்.

நீர்!வீழ்ச்சியில் அமர்ந்திருப்பவர் யாரெனத் தெரியவில்லை. மற்றவர் பிப்ஸ்க்விக். இவரைப் பற்றிய முக்கிய விபரம் - எங்கள் பக்கத்து பப்பீஸுக்கெல்லாம் இவரைக் கண்டால் சிம்ம சொப்பனம்.

வீடு வாங்கி வந்தபோது வெறுமனே ஒரு புற்தரையும் இரண்டு ப்ளம் மரங்களும் மட்டுமே நின்றன. பிறகு மெதுவாக ஒரு குட்டித் தோட்டம் ஆரம்பித்தேன். நிறைய வேலை இருந்தது. ஆனால் வேலை மும்முரத்தில் இருக்கையில் முதுகுக்குப் பின்னால் மெல்லிய மூச்சுக் கேட்கும். திரும்பினால் பல்லைக் காட்டியபடி ஒரு பைரவர் நிற்பார். இந்தத் தொல்லையில் இருந்து விடுபடவேன்று வேலி எல்லாம் போட்டு முடியவும் பக்கத்து வீட்டிற்கு வாடகைக்கு வந்தவர் இந்த பிப்ஸ்க்விக். பிறகு நாய்க்குட்டிகள் யாரையும் இந்தப் பக்கம் காணோம்.

பிப்ஸ்க்விக்கை வளர்க்கும் அம்மணி சொன்னதிலிருந்து - இவர் குட்டியாக இருக்கையில் வீட்டுக்கு வந்த விருந்தாளி நாயார் இவரைத் துரத்த ஏற்பட்ட விபத்தில், பின்னங்கால் ஒன்று உடைந்து தகடு பொருத்தி இருக்கிறார். அது முதல் நாய்களைக் கண்டால் ஆகாதாம். அவர்கள் துரத்துமுன் முன்னெச்சரிக்கையாகத் தானே துரத்திவிடுவாராம்.