ஔவை சொன்ன‌ வாக்கு!!

நத்தார் கொண்டாடுவதற்கான‌ மனநிலை இன்னும் வரவில்லை. அதனாலேயே கொண்டாட‌ வேண்டும் எனும் முயற்சியில் ஈடுபட்டிருக்கிறேன்.

செபா சொல்லுவார்... "சாகப் போற‌ மாடு, கண்டுக்குப் புல்லும் வைக்கோலும் சேர்த்து வைச்சுட்டுச் சாகிறது இல்லை," என்று. உண்மைதான். கன்று எப்படியாவது பிழைத்துக் கொள்ளும். இன்னொரு பசுவிடம் கெஞ்சியோ அடம் பிடித்தோ பாலருந்தலாம். அல்லது... இன்னொரு மாடு தீவனத்திற்கு, தன் சீவனத்திற்கு என்ன‌ செய்கிறது என்பதைக் கவனித்து அதன்படி நடந்தாலே பிழைத்துக் கொள்ளும். 

மனிதர்!! 

பிள்ளைக்கு எத்தனை வயதானாலும் அம்மா அம்மாதான். நான் நன்றாக‌, சந்தோஷமாக‌ இருப்பதைத்தான் அம்மா விரும்புவார். 

ஆண்டாண்டு தோறும் அழுது புரண்டாலும்... ம்... ஔவையாருக்கு இதைச் சொல்வது சுலபமாக‌ இருந்திருக்கும். ஒரு வயதுக்கு மேல் வளர்ப்புத் தாயையும் விட்டு, தன் காலே தனக்குதவி என்று சுற்றுலாக் கிளம்பிய‌ பெண்மணி.  ;-) பெரிதாக‌ எதிலும் பிடிப்பு இருந்திராது, தமிழைத் தவிர‌. 

ஆண்டாண்டு தோறும் அழுது புரண்டாலும்

மாண்டார் வருவரோ மாநிலத்தீர் - வேண்டா

நமக்கும் அதுவழியே நாம் போம் அளவும்

எமக்கு என்னென்றிட்டுண்டிரும். 

கடைசி ஆறு சொற்களையும் பிரித்துப் பிரித்து எழுதிப் பார்த்தேன். :‍) கவிதைத் தன்மை தொலைந்து போனாற்போல இருந்தது. தேடலாம் என்று இணையத்தில் உலாவ‌... கொடுமையொன்று கண்டேன்!! ;( படம் போட்ட‌ குழந்தைகள் அரிச்சுவடியில் 'ஔ' என்கிற‌ எழுத்துக்கு 'ஔவையார்' என்று எழுதியிருப்பார்கள். இணையத்தில் சில‌ ஔவைகளையும் ஏராளமான‌ அவ்வைகளையும் கண்டேன். ;( 

தமிழ், 'தமிழை வளர்க்க‌ நினைக்கும் தமிழராலேயே' மரித்து விடும் என்று முன்பே ஔவைக்குத் தெரிந்திருக்குமோ! அதனால் தான், 'நமக்கும் அதுவழியே நாம் போம் அளவும் எமக்கு என்ன!' என்று மனம் நோகாமலிருக்கும்படி அப்படிப் பாடி வைத்தாரோ!!! ;D

தட்டச்சு செய்வது சிரமமாகிப் போகும் என உணர்ந்து எழுத்து மாற்றம் வந்த‌ பின்பும், 'ஔ' 'ஐ' எழுத்துகளைத் தட்டுவதற்கு எந்தப் பிரச்சினையும் இல்லாதபடிதான் இருந்துவருகிறது. ஆனாலும்... நாம் 'அய்யா' என்போம்; 'அவ்வை' என்போம். ;((

மீண்டும்... விஷயத்துக்கு வருகிறேன். மாண்டார் வருவரோ மாநிலத்தீர்!! வேண்டா... நமக்கும் அதுவழியே நாம் போம் அளவும் எனக்கு என்ன‌ என்று இட்டு உண்டு இருக்கலாம்.  அதன் ஒரு படியாக‌... இந்த‌ அலங்காரம். 

கையிலிருந்த‌ பொருட்களை வைத்துச் செய்தேன். இம்முறை அழகான‌ இலைகள் அகப்பட்டன‌. ஒரு சாடியில் சில‌ மிட்டாய்களும் இருந்தன‌. இவை அம்மா வீட்டிலிருந்து எனக்குக் கடத்தப்பட‌ பொக்கிஷங்கள். தன்னைச் சந்திக்க‌ வரும் குழந்தைகளுக்குக் கொடுப்பதற்காக‌ மிட்டாய்கள் வைத்திருப்பார்.

முன்பெல்லாம் நிறமற்ற‌ செலோஃபேன் கடதாசியில் மிட்டாய்களைச் சுற்றுவேன். இம்முறை கையிலிருந்தது சிவப்பு செலோஃபேன். 
நீளமாகத் தெரிபவை ஜெல்லி மிட்டாய்கள். 

செய்முறை இங்கே ‍- http://www.arusuvai.com/tamil/node/30177 

டெரேரியம் & புதிய செல்லம்!

மாமியை இழந்த சமயம் க்றிஸ் வேலையிடத்திலிருந்து ஒரு தோழி (அவரும் க்றிஸ்தான்) மலர்ச்செண்டு ஒன்றை அனுப்பியிருந்தார். கூட வந்தது ஒரு கண்ணாடியிலானான கோளவடிவக்கிண்ணம். பிறிதொருமுறை வீட்டுக்கு வந்தபோது அது வேறு மலர்களுடன் மேசையிலிருக்க, "உங்களுக்கு உபயோகமாக இருக்கும், மாமி நினைவாகவும் இருக்கும் என்றுதான் இதைத் தெரிவுசெய்தேன். பயன்படுத்துகிறீர்கள்." என்று தன் மகிழ்ச்சியைத் தெரிவித்துக் கொண்டார்.

அவ்வப்போது பல வடிவங்கள் எடுத்தாலும் ஒரு 'டெரேரியம்'  போல மாற்றவேண்டும் என்னும் ஆசை மனதில் இருந்தது. முறைகளெல்லாம் ஒழுங்காகப் பின்பற்றுவதாக இல்லை. என் போக்கில்தான் எப்பொழுதும் நடுவேன். ஊரில்... என் ஆமைக்குட்டிகளுக்காக மீன் தொட்டியில் அழகாக ஒன்று செய்துவைத்திருந்தேன். அது ஒரு காலம்! ஹ்ம்!!! இனி வராது. ;(

செபா கொடுத்த அழகு கள்ளிச் செடிகளை நடலாம் என்று நினைத்தேன். அலன், மீன் / ஆமைத்தொட்டிகளுக்காகச் சேர்த்து வைத்த பரல்கள் இருந்தன.

முதலில் ஸ்ப்ரைட் போத்தல் அடிப்பாகத்தை வெட்டி சிறு துளைகளிட்டு எடுத்தேன். செடியிலிருந்த மேலதிக வேர்களை வெட்டினேன்.

Potting mix கொண்டு நட்டு வைத்தேன். நீர் ஊற்றினால் மண் கரைந்தோடும் என்று தோன்ற... ஸ்ப்ரே செய்து வடிய வைத்தேன். முதல் முறை என்பதால் மண்ணை முழுவதாக நனையவைத்தேன்.

நீர் தேங்காமல் வடிந்து விட அடியில் பரல்கள் பரவி...
செடியை உள்ளே வைக்க நினைக்க வந்தது சிரமம். ;) செடி மேற்பகுதி அகலமாக இருந்ததால் கண்ணாடிக் கிண்ணத்தைச் சரித்துப் பிடித்து வைக்கவேண்டியதாயிற்று. பரல்கள் ஒருபுறம் ஒதுங்கின. ;( ஒரு விதமாக சரி செய்தேன். அடியில் பரல்களின் உயரம் அதிகரிக்க, செடி உயர்ந்து போயிற்று. ;( என் மனதிலிருந்த அளவீடு பிழைத்துப் போயிற்று. ;(

பரவாயில்லை, விடுமுறையில் வேறுவிதமாக  மீள்நடுகை செய்யலாம். இப்போதைக்கு இருக்கட்டும் என்று மண் மறையும் வரை பரல் சேர்த்தேன். கையால் / கரண்டியால் எடுத்துக் கொட்டினால் இலைகள் நடுவே சேர்ந்துகொள்ளும்; மெல்லிதாகக் கிளம்பும் கண்ணுக்குத் தெரியாத தூசு உள்ளே கண்ணாடி மேற்பரப்பில் படிந்து பளபளப்பைக் குறைத்து விடும். பிறகு சுத்தம் செய்வது சிரமமான காரியம். முன்பு வேறு ஒரு சந்தர்ப்பத்தில் அனுபவித்திருக்கிறேன்.

வெவ்வேறு அளவான போத்தல்களிலிருந்து வெட்டி எடுக்கும் இந்தப் புனல்கள் எங்கள் வீட்டில் பிரபலம். உ+ம் - பொரியல் சட்டி எண்ணெய் வடித்து, பிறகு தூக்கிப் போடுவோம். இது போல் வேலைகளுக்கு நல்ல பொருளைப் பயன்படுத்திக் கெடுப்பானேன்! சட்டென்று புனல் செய்து பரல்களை உள்ளே நிரப்பி பரவிக் கொண்டேன். 

திருப்தியில்லாவிட்டாலும், ரசிக்க முடிகிற அளவு அழகாகத்தான் இருக்கிறது. மூடுவதற்கு cork எடுத்து வைத்திருந்தேன். பாத்திரத்தின் வடிவம் பொருத்தமாக இல்லை. ;( இப்போதைக்கு ஒரு பழைய சீடி, மூடியாக உட்கார்ந்திருக்கிறது. எங்கோ ஒரு பழைய சுவர்க்கடிகாரம் இருக்கவேண்டும். கண்ணில் படும்போது அதன் கண்ணாடியைப் பெயர்த்துப் பயன்படுத்தலாம் என்பதாக எண்ணம் இருக்கிறது. அளவு சரியாக இருக்க வேண்டும்.

நேற்றிரவு எடுத்துப் பார்த்தால்... உள்ளே ஒரு ஜீவராசி ;) பளபளப்பாக ஒரு கருப்புச் சிலந்தி வலைபின்னி வசிக்கிறார். ;)

ஆப்பிள் கு(கூ)டை

பொழுது போக மாட்டேன் என்றது; சேகரிப்பைக் குடைந்து கொண்டிருந்தேன். கண்ணில் பட்டது சென்ற வருடம் boxing day அன்று மலிவு விலையில் வாங்கி வந்த ஆப்பிட்பழங்கள். ஏதாவது கைவேலைக்கு உதவும் என்று வைத்திருந்தேன். இன்று பார்க்க ஒன்றிரண்டு பிளவுபட்டுத் தெரிந்தன. steirofoam கொண்டு தயாரானவை அவை. காலநிலை மாற்றம் இப்படி மாற்றிவிட்டிருக்கிறது போல. இனியும் விட்டு வைத்தால் பயனில்லாமலே குப்பைக்குப் போகும் என்று தோன்றிற்று.

வீட்டில் எப்பொழுதும் மேலதிகமாக சாப்பாட்டுக் குடைகள் இரண்டாவது வைத்திருப்பேன்.
1. இவை அதிக காலம் தாங்குப் பிடிக்காது.
2. ஊரில் பெரிய 'சாப்பாட்டு மூடி' இருந்தது. கிணற்றடியில் கொண்டுபோய் வைத்துக் கழுவி எடுக்கலாம். இவையோ கழுவிப் பாவிக்க இயலாதவை. அடிக்கடி மாற்றிவிடுவது நல்லது.
3. தப்பித் தவறி எனக்குப் பிடிக்காத உணவுப் பொருள் (பறவை) பட்டுவிட்டால் தூக்கித் தூ...ரப் போட்டு விடலாம். ;)
4. கேக் செய்யும் போது மேலதிகமாக ஒன்றிரண்டு இருந்தால் உதவும்.
இந்தக் காரணங்களுக்காக.... 'டொலர் ஷொப்' பக்கம் போனால் ஒன்றிரண்டு வாங்கி வந்து வைப்பது உண்டு.

ஆப்பிள்கள் ஆறுதான் இருந்தன. நத்தார் மரத்துக்கான சோடினைப் பொருட்கள் இருந்த பெட்டியை ஆராய மேலும் இரண்டு அளவுகளில், மொத்தம் ஐந்து பழங்கள் கிடைத்தன.

6+3+2 = !!

குடையிலிருந்த ஆறு கம்பிகளில் மூன்றில், இரண்டிரண்டு பழங்கள் - 6

 

மீதி மூன்றில் ஒவ்வொரு பழம் - 3

உள்ளே - 2

தங்க நிற நூல்களை வெட்டி விட்டு பச்சை நூல் கொண்டு இலைகளைக் குடையோடு தைத்து... தையல் விட்டுவிடாமல் nail polish - top coat பூசி.... (ஒரு போத்தலில் அடியில் மட்டும் கொஞ்சம் மீந்து இருந்தது. தடிப்பாகிவிட்டது; நகத்திற்கு இனி ஆகாது. அந்த நகத்தோடு சாப்பிடலாம் என்றால் இதுவும் ok என்று மனது சொன்னது.) ;) வெடிப்புகளின் மேல் சிவப்பு நகப்பூச்சு தடவி.... சாப்பாட்டு மேசைக்கு எடுத்து வந்தாயிற்று.

~~~~~~~~~~~~~~~~~~~~~

0---- கு 1
இது போல் முன்பு செய்த செர்ரிக் கு(கூ)டை 'அங்கே' http://www.arusuvai.com/tamil/node/17356

0---- கு 2
தட்டச்சு செய்கையில் சுற்றிய நுளம்புத்திரி - 
            ஆ...தியில், அதாவது பிளாத்திக்குக் கூடை வருமுன்பாக, எங்கள் ஒழுங்கையில் திடீரென்று எப்போவாவது 'ஊத்..தக்..கூ..டை, சாப்..பாட்..டு மூ..டீ.....' என்றொரு குரல் கேட்கும். முதல் முதல் பரவை முனியம்மாவை திரையில் பார்த்த போது மூளையில் மீண்டும் அதே குரல்... அந்த அக்கா தோற்றம், குரல் மட்டுமல்லாமல் கைவீச்சு, நடை எல்லாம் ஒரே மாதிரி இருக்கும்.

இயற்கையோடு இயைந்து போகும் மூங்கிற் கூடை காணாமற் போய் ப்ளாத்திக்கும் கடந்து, இப்போ இந்த வலைக்கூடை மேசைக்கு வந்திருக்கிறது.

இது போல் நீள் சதுரமானவைதான் பெரியவர் சின்...னவராக இருந்தபோது நுளம்பு, ஈ வலையாகப் பயன்பட்டது. இரண்டாம் மாதமே தூர உதைத்து விட்டுச் சிரிப்பார். கம்பி காவலிடத்திலிருந்து வெளியே எட்டிப் பார்க்கும். அதைச் சரியான இடத்தில் பிடித்து வைத்துத் தைக்க வேண்டும் அடிக்கடி. எவ்வளவு முட்டாள்தனமாக இருந்திருக்கிறேன். பாதுகாப்பு இல்லை என்று அப்போது நினைக்கவே இல்லையா நான்!! ஹ்ம்! ;(

அவருக்கு அது அளவில்லாது போனதன் பின் 'கேக்' மூடுவதற்காக என்று கழுவி எடுத்து வைத்தது நினைவு இருக்கிறது. இப்போ இதற்கென்றே வாங்குகிறேன்.

0---- கு 3 
இமா எடுத்த இந்தப் படம் வீணாகி விடாமல்.... பார்த்து ரசியுங்கள். ;)

பப்பியும் திராட்சைக் குலையும்!!!

ஒரே ஒரு ஊரில் ஒரு பூனை இருந்ததாம். அதற்கு ஜீனோ குலைக்குமா, குரைக்குமா என்பதில் சந்தேகம் வந்ததாம்... ;)

ம்... இங்கே இருக்கும் ஜீனோ - பொம்மை ஜீனோ; குரைக்காது.

எப்பொழுதும் இந்த மேசைக்கு....

 'ஐவி' இலைகளையும் சில திராட்சைக் குலைகளையும் வைத்துத்தான் அலங்கரிப்பேன்.  

'ஈரலிப்பு உறிஞ்சி' இயற்கை இலைகளை விரைவில் உலரவைத்துவிடுவதால் அடிக்கடி மாற்றும் வேலை இருந்தது.

சிரமத்தைத் தவிர்க்க, ஒவ்வொரு முறை $ கடைப்பக்கம் போகும் போதும் எட்டிப் பார்ப்பேன், செயற்கை திராட்சைக் கொடி கிடைக்கிறதா என்று. ஒருமுறை 'ஐவி' கிடைத்தது. வாங்கி வந்தேன். குலைகுலையாக முந்திரிக்காய் காண, வாங்கிக் கொள்ளும் ஆசை வந்தது.

சமீபத்தில் திராட்சைக் கிளை கொண்டு ஒரு தூணை அலங்கரித்திருத்திருந்தார்கள்; விசாரிக்க, உள்ளே இருந்து ஐந்து துண்டுகள், 10 $ என்று எடுத்து தந்தார்கள். அவற்றில் மூன்று மட்டும் போதுமாக இருந்தது எங்கள் மேசைக்கு.

 இவற்றுக்கு மேலதிகமாக... பச்சைக் கம்பியும் பயன்படுத்தியிருக்கிறேன்.

கிடைத்த தொட்டியில் அளவுக்கு 'ஈரலிப்பான பாலைவனப்பசுஞ்சோலை' ஹி ஹி இனியும் யாராவது தமிழ் கேட்பீங்களோ!! வெட்டி வைத்து நிரப்பி... செடியை!! நட்டு!!... ;)

பச்சைக் கம்பியை எழுதுகோலில் சுற்றி...

கொடிச்சுருள் (இணையத்தில் தேடிப் பிடித்த சொல் இது.) செய்து...

கம்பியும் பசைநாடாக்களும் அங்கங்கே கட்டுவேலைக்குப் பயன்பட்டன. உண்மையில் இவற்றை கொடிச்சுருள் செய்யவே எடுத்து வைத்திருந்தேன். பிற்பாடு வெளிர்பச்சைக் கம்பி கண்ணில் படவும் மனது மாறிவிட்டது. ம்!

உள்வீட்டில் செயற்கையான இயற்கை!! இந்த மேசையில் ஒரு கோப்பை தேனீரோடு அமர்ந்தால் எந்த வேலையானாலும் ரசனையாக முடியும்.

~~~~~~~~~~~~~~~~~~~~~~~~~~~~~

பின்னிணைப்பு

'எட்டுமா இது!'

'செல் --- போதவில்லை. நாளைக்காலை முதல் வேலையாக நிலாவைக் கொண்டு அதிக வலு செல் ஒன்று பெற்றுக்கொள்ள வேண்டும்.'

' அட! அது என்ன!! குருவித் தம்பதி குடியிருக்கிறதா அங்கே!!'

"சிப் சிப்!"

"ஹாய் ஜீனோ!"

"ஹாய் ஜீனோ!"

"ஹாய்! இது என்ன வார்த்தை! என் மெமரியில் இல்லையே!!"

"அது.. ஒரு வகை விசாரிப்பு."

"பழம் வேணுமா உனக்கு? பிடுங்கிப் போடட்டுமா?"

"ம்! நிறையப் போடு."

'இதிலிருந்து வீட்டிலேயே ஜேவ் தயாரிக்கலாமா என்று நினைவாக நிலாவை விசாரிக்க வேண்டும்... நாளை.'

"ஜீனோ! தயவு செய்து போகிறபோது நாற்காலி எல்லாம் சரியாக்கிவிட்டுப் போகிறாயா? இமாவுக்கு ஒழுங்கில்லாமலிருந்தால் பிடிக்காது."

"ஒரு அற்ப சிட்டுக்கு அடிபணியவேண்டிய தேவை எனக்கில்லை. அன்பாகக் கேள் செய்கிறேன்."

"சரி, அன்பாக"

 

'சர்... சர்ர்.... டமார்... டர்ர்ர்ர்ர்ர்'

"போதுமா!"

 

விசுக் விசுக் என்று நடந்து போகிறது ஜீனோ

வவ்

வ

வ்

.

.

.

;)

ஃபீஜோவா ஃபான்டெய்ல்

ஹலோ ஃபான்டெய்ல்!!

என் வீட்டுத் தோட்டத்தில், இப்படி ஒரு ஃபீஜோவாச் செடியில் 

இப்படிப் பூத்து...

 

(கீழிருந்து பார்த்தால் இலைகள் இப்படித் தெரியும்.)

  

இப்படிக் காய்த்து.... 

இப்படி என் சமையல் மேடையில் வந்து இருந்தவற்றை....

 இப்படி வெட்டி வைத்துச் சாப்பிட்டாயிற்று. 

யம்.. யம் ;P

ஒழுங்கற்ற அமைப்போடு இருந்த ஒன்று இப்படிப் பறவையானது.

 

 இது.. ஃபீஜோவா அல்ல, பொஹுடுகாவா - நியூஸிலாந்து கிறிஸ்மஸ் மரம்.

இன்றைய அறுவடை

இமாவின் உலகில் இறுதியாக (62வதாக) இணைந்துகொண்ட குறிஞ்சிக்காகவும், எனக்கே தெரியாமல் என்னைப் பின்தொடரும் அனைவருக்காகவும் என் உலகத்து ஸ்ட்ராபெரிச்செண்டு. 

மலர்களே! மலர்களே!

இங்கு அனைவரும் காண என் உலகைப் பின்தொடரும் அறுபத்தொருவருக்காகவும் இன்று பறித்த என் தோட்டத்து மலர்கள்.

ஒரு மீற்றர் உயரம் வளரும் என்று செடியில் தொங்கிய சிட்டை சொல்லிற்று. செடியோ கொடியாகிப் படர்கிறது. மூன்று வருடங்களாக எங்கள்  வீட்டு 'ட்ரைவ் வேயில்' பூத்துச் சிலிர்க்கின்ற இந்த ரோஜாவிலிருந்து பதியன்கள் வைத்து வேறு இடத்தில் நட்டிருக்கிறேன்.

'ரோஜா' வண்ணத்தில் அழகிய பெரிய பூக்கள்; அதைவிட மென்மையான வண்ணத்தோடு குட்டிக் குட்டியான பூக்கள்; இடை இடையே மொட்டுக்கள்; சிவப்பாய்த் துளிரிலைகள், கொஞ்சம் பெரிய மென்பச்சை இலைகள்; கடும்பச்சையாக பளபளவென்று முதிர்ந்த இலைகள்; தளதளவென்று எறியும் சிவந்த மொத்தக் கிளைகள்; மெல்லிய பச்சைக் கிளைகள்; முதிர்ந்து வயதானதால் பசுமையற்றுப் போன கிளைகள்; எப்போதும் பூக்களுக்காகச் செடியைச் சுற்றிச் சுற்றி வரும் வண்டுகள்; சென்ற வருடத்து வசந்தத்தின் அடையாளமாக மீந்து போன காய்கள் என்று வாழ்க்கையின் பல படிகளையும் ஒருங்கே கொண்ட இது... ஒரு செடி மட்டும் அல்ல. என் தோழி.

தினமும் காலையில் வேலைக்குப் புறப்படும் சமயம் முதலில் ரோஜாத் தரிசனம், மிகச் சிறிதே ஆனாலும் அழகான நொடிகள் அவை. மெத்தென்றும் சட்டென்று விதம் விதமாய்த் தலையசைத்து காலைவணக்கம் சொல்லும் என் ரோஜாக்கூட்டம். அந்த நொடிச் சந்தோஷம் நாளை அருமையாக ஆரம்பித்து வைக்கும். (சமீபகாலமாக பாடசாலையில் இருக்கும் மேரிமாதாவுக்காக தினமும் சில பூக்கள் கொண்டு செல்லும் வழக்கம் தொற்றி இருக்கிறது.)
மீண்டும் வீடு திரும்புகையில் பூக்களைப் பார்த்ததும் களைப்புக் காணாது போய்விடும்.கொஞ்ச நேரம் செடியோடு பேசிக் கொண்டிருந்துவிட்டுத் தான் உள்ளே போவேன்.

செடியிலிருந்து உதிர்ந்த இதழ்கள் எப்பொழுதும் 'ட்ரைவ் வே' முழுக்கக் கோலம் போட்டிருக்கும். அது ஒரு அழகு.

தோட்டத்தில் பூக்கள் போதிய அளவு கிடைக்கிறது. நான் பெற்ற இன்பம் பெறுக இவ் வையகமும் என்று எங்கு சென்றாலும் செபா அறுசுவையில் செய்துகாட்டிய பூச்செண்டு போல் ஒன்று கொண்டு செல்கிறேன். பெறுபவர் சந்தோஷம் என்னை மேலும் சந்தோஷப் படுத்துகிறது.

ஒரு வீட்டுக்கு மறுமுறை சென்றபோது அந்த வீட்டு ஆன்டி கொட்டிப் போன பூக்களை எடுத்துவிட்டு நான் மீண்டும் பாவிக்கட்டும் என்று மீதி அமைப்பைப் பாதுகாத்து வைத்திருந்து எடுத்துக் கொடுத்தார். எங்கள் அதிபர் பிறந்தநாளுக்குக் கொடுத்தது பாடசாலையில் இருக்கும் பெரிய மேரிமாதா பாதத்தின் அருகே இருக்கிறது. பதினெட்டாம் அறை ஆசிரியர் மேசையில் அவர் பிறந்தநாளுக்குக் கொடுத்தது இருக்கிறது. இரண்டிலும் தினமும் பூக்களைப் புதுப்பிக்கிறேன்.

இன்று இது உங்களுக்காக.

விருந்தினர் வந்தால்தான் மேசை அலங்காரமா!

விருந்தினர் வந்தால்தான் மேசை அலங்காரமா!

 

நமக்காகவும் ஒன்று இன்று. ;) மெதுவாக ஒவ்வொரு திராட்சையாக எடுத்து ரசித்து நறுக்கி...

பாதியை வாயில போட்டு, மீதியை குச்சியில் குத்தி...

 

ஸ்டான்ட் ஒன்று வேண்டுமே! 

என் மகன் அடிக்கடி கரிசனத்தோடு சொல்கிறார், 'அம்மா... டெய்லி ஒரு ஆப்பிள் சாப்பிடுங்க. சாப்பிடணும்.' ;) அதற்காக, திராட்சை சாப்பிட்டாலும் ஒரு ஆப்பிள் சேர்த்து சாப்பிடலாம். 

இந்த ஒரு துண்டு ஸ்டான்ட்டுக்கு....

இலை வேண்டுமே!! குட்டிக் குட்டிப் பார்ஸ்லி நெட்டுகள் சொருகலாம். ;)

அழகா இருக்கே! இனி இதைச் சாப்பிட வேணுமா! ;(

லஞ்சுக்கு வாங்கோ!

கிறிஸ் ஒரு முழுப் பூசணிக்காய் வாங்கி வரவும், மீண்டும் கை துருதுருத்தது. அறுசுவைக்கு ஒரு குறிப்புக் கொடுக்கலாம் என்னும் நோக்கில் தயாரானேன்.

நீர், நீள நீளமாக முகில்கள், ஒரு nikau palm, cabbage tree, flax, அலைகளைக் கொஞ்சமாவது 'koru' மாதிரி...மூலையில் ஒரு ஆமை என்று வரைந்து கொண்டேன்.

நினைத்தது போல் சுரண்ட வரவில்லை. ;) அதனால் 'ஸ்டெப் பை ஸ்டெப்' எடுக்கும் எண்ணத்தைக் கைவிட்டு விட்டு இஷ்டம் போல் சுரண்ட ஆரம்பித்தேன். இருந்தாலும் அதே மரம்... என்ன கொஞ்சம் மாடர்ன் ;) 

ஃபிளாக்ஸ் கூட வேறு பூப் பூத்து விட்டது. ;)

ஒரு மீன் தொட்டி. 

ஒரு ஃபான் டெய்லும்...

...வாத்தும்.

 நாளை எல்லோரையும் வெட்டிக் கூறு போட்டுச் சமைக்க வேண்டியது தான். 

லஞ்சுக்கு வாங்கோ. ;)

சீச்சீ! இந்தப் பழ(ட)ம் புளிக்கும்

நேற்றுத் திடீரென்று ஒரு யோசனை, டைனிங் ஸ்பேசில் உட்கார்ந்திருக்கும் வட்டக் கண்ணாடி மேசையை அலங்கரித்துப் பார்க்கலாமா!

புதுமையாக இருக்கும். ஆனால், நன்றாக இருக்குமா இல்லையா என்று விஷுவலைஸ் பண்ணிப் பார்க்க முடியவில்லை. முயற்சிக்கலாம் என்று தோன்றியது.

(ஃப்ளாஷ் போட்ட போது மேசையில் கீறல்கள்)

இந்த மேசை பத்து வருடங்கள் முன்பாக எங்கள் வீட்டுக்கு வந்து சேர்ந்தது. இதில்தான் சாப்பாடு, என் கிராஃப்ட், அயர்னிங் என்று எல்லா வேலைகளும் நடக்கின்றன. இப்போ நிறையக் கீறல்கள் விழுந்து விட்டாலும் மாற்ற மனம் இல்லை. கதிரைகளுக்கு மட்டும் இருமுறை துணி மாற்றி இருக்கிறோம். முதல் முறை மகனும் நானும் மாற்றினோம். இரண்டு வருடங்கள் முன்பதாக கிறிஸ்ஸும் நானும் மாற்றினோம்.

(யன்னலூடாக வெயில்)

மேசைக்கும் புது வடிவம் கொடுக்கலாம் என்ற என் முதல் முயற்சியின் முடிவு இது. அப்பப்போ வேறு விதமாக அலங்கரிப்பதாக இருக்கிறேன். உங்கள் அபிப்பிராயங்கள் (எவ்வகையாக இருப்பினும்) வரவேற்கப்படுகின்றன.

பயன்படுத்தி இருப்பவை 

• வேண்டாம் என்று கழித்த பீங்கான் சூப் கிண்ணம் ஒன்று
• மீள் சுழற்சியாகக் கொஞ்சம் 'வெட் ஓயாசிஸ்' (wet oasis)
• காய்ந்த பாசி கொஞ்சம் 
• ஸ்பைடர் பிளான்ட் (spider plant ) கொப்புகள் சில
• ஐவி (ivi) கிளைகள் சில
• கிளாஸ் பிளான்ட் (glass plant - சரியாகப் பெயர் நினைவு வரமாட்டேன் என்கிறது ;(  ) கிளைகள் சிறிது
• மூன்று செயற்கைத் திராட்சைக் குலைகள்
• ஒரு கிண்ணம் நீர்
• இரண்டு கைகள்
• கொஞ்சம் கற்பனை

(சுவரில் தொங்கும் நான் வரைந்த ஓவியமும் யன்னலூடாகத் தெரியும் திராட்சைப் பந்தலும் தலைகீழ் விம்பங்களாக)

(தூங்கும் உறியின் விம்பம்)

(திரைச்சீலைகள் மூடி இருந்தபோது)

புகைப் படம் எடுப்பதில் நிறையச் சிக்கல்கள்...

• யன்னல் திரைச்சீலையை இழுத்து மூடினால் இருளாக இருக்கிறது.
• ஃப்ளாஷ் போட்டால் கண்ணாடியில் ஒளி பிரதிபலிக்கிறது.
• திரைச்சீலை திறந்திருந்தால் வானம், பறவைகள், ஆகாய விமானம் என்று எல்லாமே துல்லியமாகப் பிரதிபலிக்கிறது.
• கமரா திரையில் திருப்தியாகத் தெரிந்த படத்தை கணணித் திரையில் பார்த்தாலோ... நட்ட நடுவே இமா முகம் தெரிகிறதே!! ;D

என்னால் முடிந்த 'பெஸ்ட்' இதுதான்.
 

யாராவது விஷயம் தெரிந்தவர்கள் இந்த மாதிரியான போட்டோ எடுப்பதற்கும் ஏதாவது டிப்ஸ் கொடுப்பீர்கள் என்று நம்புகிறேன்.

எடுத்த மீதிப் படங்கள் கொலாஜாக