நைஸ்! நைஸ்!

இலங்கையில் தெருவில் மணி அடித்துக்கொண்டு ஒருவர், தோளில் ஒரு பக்கம் கண்ணாடியாலான உயர்ந்த தகரப் பெட்டியைத் தூக்கி வருவார். அதன் உள்ளே தும்பு மிட்டாயும் அதே நிறத்தில் நைஸும் இருக்கும்.

நைஸ்... நினைத்தாலே வாயூறும் எனக்கு. பெரிய வட்டமாக, இறுக்கிப் பிடித்தால் பொடியாகும் அளவு மென்மையாக ஆனால் மொரமொரப்பாக இருக்கும். ஈர உதட்டில் பச்சக்கென்று ஒட்டிக் கொள்ளும். சுவை... இனிமை இருந்தும் இல்லாமலும் இருக்கும். எத்தனை சாப்பிட்டாலும் அலுக்காது அத்தனை எடை குறைந்த தின்பண்டம். இலங்கைக்குப் போகும் சமயம் கூட மணிச்சத்தம் கேட்டதும் வெளியே போய்ப் பார்ப்பேன். வாங்கிச் சாப்பிடாமல் விடுவது இல்லை.

அத்தனை அருமையானதொன்றை நினைத்த போதெல்லாம் சாப்பிடக் கிடைத்தால்!

ப்ரின்சியின் சமையலறையில் கண்டேன் செய்முறையை.  மிக்க நன்றி ப்ரின்ஸி. உங்கள் உதவியால் எந்தவித வித்தியாசமும் இல்லாமல் அருமையான நைஸ் சாப்பிடக் கிடைத்தது.

ரொட்டி மேக்கர் இருந்தால் மட்டும்தான் நைஸ் செய்யலாம். பெரிய நைஸை எப்படிச் செய்திருப்பார்கள்!! இரண்டு தோசைக்கற்களை பிணைச்சல் போட்டு இணைத்து வைத்திருப்பார்களோ!! :-)

இங்கே குறித்து வைத்தால் காணொளி காணாமற் போனாலும் பிறிதொரு சமயம் தேடி எடுக்கச் சுலபமாக இருக்கும்.

தேவையாக இருந்தவை
மா - 165 கி
சீனி -2 மே.க
நீர் - 360 மி.லீ
கலரிங்

சுவை சேர்க்க வேண்டும் என்பது அவசியம் இல்லை. விரும்பினால் சேர்க்கலாம்.

ப்ரின்ஸி சொல்லியிருந்த முக்கியமான விடயங்களை மட்டும் குறித்து வைக்கிறேன்.
கரைசலை வடிகட்டவேண்டும்.

நிறம் கடுமையாக இருக்க வேண்டும்.

ரொட்டி கிங் நடுத்தர சூட்டில் இருக்க வேண்டும்.

2 - 2 1/2 மேசைக்கரண்டி கலவை போதும்.

மூடி, 30 செக்கன்களுக்கு அழுத்தியும் 45 செக்கன்கள் மெல்லிதாகவும் பிடித்தால் போதும்.

திறக்கும் போது சிரமப்படுத்தித் திறக்கக் கூடாது. தானாக வந்தால்தான் சரியாக வரும்.

திருப்பிப் போட்டு 10 செக்கன்கள் விட்டு எடுக்க வேண்டும்.

சுருக்கமாகவே குறித்து வைத்திருக்கிறேன். இதைப் படித்தால் மீதி விபரங்கள் எனக்குத் தானாகவே நினைவுக்கு வந்துவிடும்.

இந்த இடுகை என்றாவது.... தொடரும்.

புல்டோ டொஃபி

எனக்கு இந்த மிட்டாய் மேல் அப்படி ஒரு விருப்பம். சின்ன வயதில் சாப்பிட்ட பிறகு சாப்பிடக் கிடைக்கவில்லை. கிடைக்கவில்லை என்பதை விட... வேறு விடயங்கள் ஈடுபாடு... கடமைகள் என்று மூழ்கிப் போனதில் தேடிச் சாப்பிடத் தோன்றவில்லை.

அறுசுவைக்குப் போக ஆரம்பித்து... 'மறந்து போன உணவுகள்' என்று இழையொன்று கண்ணில் பட்டு மீண்டும் ஆசையைத் தூண்டி விட்டது. அங்கு கேள்வியை வைக்க... இலங்கையர் சிலர் இணைந்தார்கள். இலங்கை வானொலி இந்தியர்களுக்கும் புல்டோவை அறிமுகப்படுத்தி இருந்தது. எல்லோருமாக கல்கோனா, கமர்கட், கட்டாமிட்டாய் முதல் புளூட்டோக் கிரகம் வரை அலசி ஆரய்ந்துவிட்டு களைத்துப் போய் பனைவெல்லம், கருப்பட்டி ஆராய்ச்சியோடு முடித்துக் கொண்டோம்.

நான் விடுவதாக இல்லை. இலங்கைக்குப் போனால் இதே எண்ணம். இங்கு எங்கே சிங்களவரைக் கண்டாலும், 'புல்டோ செய்யத் தெரியுமா?' என்று பிடித்துக் கொள்வேன். ஒரு கட்டதில் நான் சிங்களம் பேசும் யாரிடமாவது புதிதாக அறிமுகம் ஆகும் சமயம் க்றிஸ் அருகே நின்றால் தானாகவே, 'புல்டோ தலைப்பு வரப் போகிறது,' என்று சிரிக்க ஆரம்பித்தார்.

பதினொரு வருடங்கள் இவ்வாறே இனிது கழிந்தன.

சென்ற வருடம் சில மாத இடைவெளிகளில் சுரேஜினியும் உமாவும் நினைவாக யூட்யூப் குறிப்பு ஒன்றை அனுப்பி வைத்தார்கள். அத்தனை ஆசை இருந்தும் வேறு வேலைகளில் இன்று நாளை என்று கடத்திக் கொண்டே போய்விட்டேன்.

சில வாரங்கள் முன்பாக மீண்டும் நினைவுக்கு வந்தது புல்டோ. பேக்கிங் கடதாசியை ஒரு கணக்கிற்கு வெட்டி வைத்தேன். பிறகு அப்படியே விட்டுவிட்டேன். தேங்காய் துருவிப் பிழிந்தால் கணக்கு சரியாக வரும்; கோரானா காலம் - தகரத்தில் அடைத்த தேங்காய்ப்பால்தான் இருக்கிறது. அது 400 ம்.லீ தகரம். அளவைக் குறைப்பதா கூட்டுவதா? பரிசோதனை முயற்சிதானே! குறிப்பில் சொன்னபடி 350 மி.லீ தேங்காய்ப்பாலும் 200 கிராம் சீனியும் பயன்படுத்தி... முன்பே க்றிஸ்ஸை எடுபிடி வேலைக்கு வரத் தயாராக இருக்கச் சொல்லி புக் செய்துவைத்துவிட்டு ஆரம்பித்தேன் வேலையை.

முதல் உதவி - பாலைப் பதமான சீனிப் பாகில் கொட்டுவது, இரண்டாவது உதவி - உருட்டிப் போடுபவற்றைப் பொதிந்து வைப்பது.

காணொளியில் சொன்னதை நம்பாமல் வாழையிலையின் உதவியை நாடியிருக்க வேண்டும். பிழை விட்டுவிட்டேன். பேக்கிங் பேப்பரில் கொட்டினேன். ஆரம்பத்தில் சரியாக இருந்தது மெதுவே இறுகியதும் பேப்பரோடு ஒட்டிக் கொண்டது. 'மைக்ரோவேவ் செய்தால் இளகாதா?' க்றிஸ்ஸின் யோசனை நன்றாகத் தான் தெரிந்தது. சிறிய துண்டுகளாக உடைத்து இளக வைத்தால் மீண்டும் உருட்டும் பதம் கிடைத்தது. ஆனாலும் என் பொறுமையின்மையால் கடதாசியை அங்கங்கே மடித்து பிரித்து எடுப்பதற்குச் சிரமமாக ஆக்கிக்கொண்டேன். அதற்கென்ன! போஸ்டர் சாப்பிடும் பசுவின் பாலைக் குடிக்கலாமென்றால் பேப்பரோடு புல்டோ சாப்பிடுதல் மட்டும் ஆகாததா!  பாக்குவெட்டியால் நறுக்கி டப்பாவில் போட்டு வைத்தேன். வாயில் போட்டுச் சுவைத்து முடிய, கடதாசி வாயில் தங்கிற்று. அப்படியே சாப்பிட்டு முடிக்கலாம்.

  

இருபத்தைந்து மிட்டாய்களை ஒழுங்காகச் சுற்றி எடுத்தோம். மீதியைக் கெடுக்காமல் எடுத்திருந்தால் முப்பந்தைந்து மிட்டாய்கள் வரை தேறி இருக்கும்.

செய்முறை வேண்டுமானால், மேலே போய் சுட்டியில் அழுத்தி வீடியோவைப் பாருங்கள்.

மைக்ரோவேவ் சாக்லெட் கேக்

நாக்கு இனிமைக்கு ஏங்கிற்று. சேமிப்பில் எதையும் காணோம். நேரம் அதிகம் செலவளிக்காமல், பாத்திரங்கள் கழுவுவதற்கும் இல்லாமல்.... என்ன செய்யலாம்!!!

ஏற்கனவே நான் அறுசுவையில் கொடுத்திருந்த மைக்ரோவேவ் ப்ரௌணி குறிப்பைத் தேடிப் பிடித்தேன். 

சீனி 250 ml!! சற்று அதிகம். ;( ஒவ்வொரு 1/8 பங்குத் துண்டிலும் 1/8 கோப்பை சீனியா! மாற்றலாம் அளவை - அரைக் கோப்பை பழுப்புச் சீனி + அரைக் கோப்பை ஈக்வல் சேர்க்கலாம். ஒரு நாளைக்கு 1/8 துண்டு மட்டும் சாப்பிடலாம். கொக்கோ பௌடர் வீட்டில் இல்லை, ஆனால் 'ட்ரிங்கிங் சாக்லேட்' இருக்கிறது. அதைப் பயன்படுத்தலாம்.  

ஈரமான பொருட்களுடன் சீனி & ஈக்வல் சேத்து அடித்துக் கொண்டேன். மீதிப் பொருட்களை ஒன்றாகச் சலித்து எடுத்து, ஈரக் கலவையுடன் சேர்த்து நன்கு கலந்து, கண்முன் தெரிந்த கண்ணாடிப் பாத்திரத்திலிட்டு 5 நிமிடம் மைக்ரோவேவ் செய்யப் போட்டேன். இரண்டு நிமிடங்கள் கழித்துப் பார்க்க கேக் முழுவதாகப் பொங்கி கிட்டத்தட்ட வழியும் நிலைக்கு வந்திருந்தது. சட்டென்று திறந்து ஒரு பீங்கானை கண்ணாடிப் பாத்திரத்தின் கீழ் தள்ளிவிட்டேன். ஐந்து நிமிடங்கள் கழித்து....

கேக் தயார். அலங்காரத்துக்காக மேலே சாக்லெட் ட்ராப்ஸ் வைத்துவிட்டேன். இம்முறை வழக்கமாக வருவதைப் போல் அல்லாமல் மிகவும் மெத்த்த்... மறுநாள் கூட மென்மை அதிகம் குறையவில்லை.

விருந்தாளி வரும் போது முன்பே அடித்து, கிண்ணத்தில் ஊற்றிவைத்துவிட்டால், அவர்கள் இருக்கும் போதே மைக்ரோவே செய்து சூடாகப் பரிமாறலாம்.

எந்த எலி மாட்டுகிறது என்று பார்க்கலாம்! :-)

டாரோ ரோஸ்ட்

குறிப்பு இல்லாச் சமையல் இது. :-)

டாரோ இங்கே, சாமோவா, டொங்காவில் இது டாலோ. தமிழில்... சேப்பங்கிழங்கு!

இலங்கையில் இருந்தவரை சாப்பிட்டது இல்லை. ஆனால் சிங்களவர்கள் சாப்பிடுவார்கள் என்பது தெரிந்திருந்தது. ஏதோ ஒரு பழைய திரைப்படத்தில் (பதர்பாஞ்சாலி என்பதாக நினைவு. நிச்சயமாகச் சொல்லத் தெரியவில்லை.) வறுமையிலிருக்கும் பிள்ளைகளுக்கு உணவு சமைக்க, இருட்டில் தாய் இந்தக் கிழங்குகளைப் பிடுங்கிப் போவதாகப் பார்த்திருக்கிறேன். கறுப்பு வெள்ளைத் திரைப்படம், அதிலும் மிகப் பழைய பிரதி வேறு. டாரோ என்று ஊகிக்க முடிந்தது.

பத்து வருடங்களின் முன்பு, கூடக் கற்பித்த ஃபிஜி ஆசிரியை கன்று ஒன்றைக் கொண்டு வந்து கொடுத்தார். வேலி ஓரமாக மெதுவே நீண்டு பெருகிற்று தாவரம். வீட்டில் தனித்திருக்கும் பகற்பொழுதுகளில், அவ்வப்போது கிழங்குகளைப் பிடுங்கி மைக்ரோவேவ் செய்து கட்டசம்பலைத் தொட்டுக் கொண்டு சாப்பிடுவேன். பிஞ்சுக் கிழங்குகள் சற்று வழுக்கும். முதிர்ந்தவை சுட்ட கிழங்கு போல் இருக்கும். க்றிஸ் சாப்பிட மாட்டார். அறிமுகமில்லாத உணவுகளைத் தொடத் தயங்குவார். எனக்கு தாவர உணவு என்றால் அதிலும் புதினமாவை பிடிக்கும். :-) இவற்றின் இலைச் சுருள் பொரியல் மிகவும் பிடிக்கும்.

வேலி ஓரத்தைச் சுத்தம் செய்யும் முயற்சியில் டாரோச் செடிகளை அப்புறப்படுத்த ஆரம்பித்திருந்தேன். வீணாக்குவதாக இல்லை, சாப்பிட்டுத்தான் முடிக்க வேண்டும். அந்தச் சமயம் நாத்தனாரும் இங்கு வந்து சேர, இடைக்கிடை ஒரு தொகுதி கிழங்குகளைப் பிடுங்கி அங்கு அனுப்பி வந்தேன்.








சென்ற வாரத்து அறுவடையில் சமைத்தது இது ----------------> 







வழுக்கும் தன்மையான கிழங்குகளையும் ஒரு வாரம் வரை பிடுங்கி வைத்திருந்து சமைத்தால் சற்று முற்றிவிடும். பிடுங்கியதுமே மண்ணைக் கழுவி வைத்துவிடுவேன்.

அப்படி வைத்திருந்ததை இந்த வாரம் மைக்ரோவேவ் செய்து (எத்தனை நிமிடங்கள் சமைக்க வேண்டும் என்பது கிழங்கின் அளவைப் பொறுத்தது. ஒரே அளவான கிழங்குகளை ஒன்றாக வைத்து இரண்டு நிமிடங்கள் ஓட விட்டு, திறந்து சோதித்து, திருப்பிப் போட்டு மீண்டும் இரண்டு நிமிடங்கள் ஓட விட்டு...  நேரக் கணக்கு பயிற்சியில் தானாக வந்துவிடும்.) ம்... மைக்ரோவேவ் செய்து சில நிமிடங்கள் வெளியே எடுத்து வைக்க வேண்டும். ஆறியும் ஆறாமலும் இருக்கும் போதே தோலைப் பிரிக்க வேண்டும். படைபடையாக வரும். (ஆவி வரும், கை கவனம்.) இப்படியே இட்லிப் பொடி, எண்ணெய் தொட்டுக் கொண்டு சாப்பிடலாம்.

அல்லது வட்டமாக கால் அங்குலப் பருமனில் வெட்டிக் கொண்டு, ரொட்டி சுடுவது போல் எண்ணெய் பூசிய தட்டில் போட்டு இரு பக்கமும் சுட்டு எடுக்கலாம். மேலே உப்பு & mixed herbs, lemon pepper, garlic flakes, tuscan seasoning என்று சுவையூட்ட எதையாவது தூவிக் கொண்டும் சுடலாம். இம்முறை க்றிஸ் நன்றாக இருக்கிறது என்று கொடுத்த முழுவதையும் சாப்பிட்டுவிட்டார்.

இன்னும் ஒரு அறுவடை கிடைக்கும். பிறகு தொட்டியில் வளர்க்கலாம் என்று இருக்கிறேன். தொட்டியில் என்றால், தொட்டியில் அல்ல; பழைய recycle bin இருக்கிறது. இப்போது அவை புழக்கத்தில் இல்லை. காய்கறி பயிரிட உகந்தவை. அவற்றில் ஒன்றில் ஏற்கனவே ஒரு குட்டிக் கிழங்கைப் போட்டிருந்தேன். தளதளவென செழித்து வளருகிறது. பெருப்பித்து எடுக்க வேண்டும்.

மெது...வடை

சமையற்குறிப்பு கொடுக்கப் போகிறேன் என்று நினைத்து ஏமாற வேண்டாம். :-)

கடைசியாக இந்தியா சென்றிருந்த சமயம் - எங்கோ துணி வாங்கிய போது அன்பளிப்பாகக் கிடைத்தது இந்த உபகரணம். ஒரு தரம் பயன்படுத்தினேன். பலன் கிடைக்கவில்லை. எப்போதாவது டோநட் செய்யும் போது பயன்படுத்தலாம் என்று வைத்துவிட்டு மறந்து போனேன்.

கடைக்குப் போவதைத் தவிர்க்க வேண்டி... பேக்கிங் சோடா, ஈஸ்ட் மேலதிகமாக எங்காவது இருக்கிறதா என்று தேடி சமையலறையைக் குடைந்தேன். இது கண்ணில் பட, வடை செய்யும் முனைப்பில் இறங்கினேன்.

முன்பு பிழைத்ததற்கான காரணம், வடையில் சேர்த்திருந்த உளுந்து தவிர்த்த மீதிப் பொருட்கள் என்பதாக நினைவில் இருந்தது. வேலையை ஆரம்பிக்கும் முன் யூட்யூபில் ஒரு குட்டித் தேடல் - தண்ணீர் குறைவாக இருந்தால் ஒழுங்காகப் பிரிந்து வராது, அதிகமாகவும் இருக்கக் கூடாது என்று புரிந்தது.

இம்முறை தனி உளுந்தை அளவாக நீர் தெளித்து அரைத்து உப்பும், முழு மிளகும் வெகு சிறிதாக அரிந்த கறிவேப்பிலையும் மட்டும் சேர்த்த்துக் குழைத்தேன்.

வேலை வெகு சுலபமாக இருந்தது. கிண்ணத்தில் மாவை நிரப்பி, அதை மேசையில் வைப்பதைத் தவிர்க்க இன்னொரு குட்டிக் கிண்ணத்தை எடுத்து வைத்துக் கொண்டேன். எண்ணெயைக் காய வைத்து பிழிந்து விட கிட்டத்தட்ட ஒரே அளவான வடைகள் கிடைத்தன. ம்... இது பிழிபவரது கையில் இருக்கிறது. ஒரே அளவு அழுத்தம் கொடுக்க வேண்டும். இன்னொரு விடயம் - எண்ணெய் மட்டத்திற்குச் சற்று மேலே உபகரணத்தைப் பிடித்து (கொதிக்கும் எண்ணெயில் பட்டால் ப்ளாத்திக்கு உருகி விடும் அபாயம் இருக்கிறது. அதிக உயரமாகப் பிடித்தாலும் எண்ணெய் கையில் தெறிக்கலாம்.) முழுவதாக அழுத்தி, தேவையான அளவு வரும் வரை பொறுத்து, சட்டென்று அழுத்தியை விலக்க... நடுவில் துளையுடன் வடைமா எண்ணெயில் விழுகிறது. கை, கரண்டி என்று எங்கும் மாப்பசை இல்லாமல் சுத்தமாக சுலபமாகப் பொரித்து எடுக்க முடிந்தது.

பனங்களி பைக்லட்

ஊரில்.... மாவைக் கரைத்து மெல்லிசாக தோசையாக வார்த்து, அதற்கு வறுத்த பயறு, தேங்காய்ப்பூ, சீனி சேர்த்துக் கலந்த கலவையை நடுவில் வைத்து நீளமாகச் சுருட்டி... 'பான்கேக்' செய்வோம்.

இங்கு வந்தபின்... பான்கேக் / பைக்லட் - இனிமையான சின்ன வட்டமாக, தடிப்பாக மெத்தென்று வார்த்து, சூடாக இருக்கும் போதே மேலே வெண்ணெய் வைத்து, உருகியதும் உருகாததுமான நிலையில் சாப்பிடுவேன்.

ஊரில்.... பனங்காயிலிருந்து களி எடுத்து பனங்காய்ப் பலகாரம் சுட்டுச் சுடச் சுட வாசனையை நுகர்ந்தபடி சாப்பிடுவோம்.

இங்கு வந்தபின்... போத்தலில் அடைக்கப்பட்டு விற்கப்படும் பனங்களியை வாங்கி பனங்காய்ப் பலகாரம் சுட்டுச் சாப்பிட்டிருக்கிறேன்.

மேலே படத்திலுள்ளது இரண்டுக்கும் இடையில் ஒரு கலவை. ;-) போத்தல் பனங்களியில் பனங்காய்ப் பலகாரம் சுட்டுக்கொண்டிருக்கும் போது, "பான்கேக்காக வார்த்தால் என்ன!" என்று தோன்றியது. வார்த்தேன். சுவை அபாரம். 

ஆக்வாஃபாபா விப்ட் க்ரீம்

தற்செயலாகக் கண்முன் தோன்றிய‌ அந்தக் காணொளியைத் தொடர்ந்து பார்க்க‌ வைத்தது... உண்மையில் அந்தக் குட்டிப் பையனின் சிரித்த‌ முகம்தான். பார்க்கும் போது எங்கள் பாடசாலையில் சின்னவர்கள்  oral presentation இற்குத் தயாராவது நினைவுக்கு வந்தது.

ஒரு தடவை சின்னவரொருவர் எலிப்பொறி வேலை செய்யும் விதத்தை விளக்கினார். பழகும் போது எல்லாம் நன்றாகத்தான் போய்க்கொண்டு இருந்தது. பரீட்சகர் முன்னால்... பொறி சின்னவரது கையை இறுகப் பற்றிக் கொண்டது. வலியில் துடித்து போனார் சின்னவர். பரீட்சகர் பதறிப் போனார். சின்னவரோ வலியின் மத்தியிலும் நிறுத்தாமல் தொடர்ந்து தன் பேச்சை முடித்துவிட்டே கையைப் பார்த்தார். 

இந்தச் சின்னவர் சொன்ன‌ விதம் என்னைக் கவர்ந்தது; க்ரீம்  செய்து பார்க்க‌ வைத்தது.

க்றிஸ்ஸுக்கு கடலை கடிக்க‌ முடியாதாம். எப்பொழுதும் ப்ரெஷர் குக்கரில் போட்டு மெத்தென்று அவித்து வைப்பார். (நான் தனியாக‌ எனக்கு அவித்துக் கொள்வேன்.) யேமன் சொன்ன‌ அளவு கடலை, நீர், நேரம் எல்லாம் பார்க்கவில்லை க்றிஸ். அது அவருக்கு வேண்டாத‌ வேலை. உப்பும் போட்டிருந்தார். தண்ணீரை வடிக்கும் போது கண்டுவிட்டேன். அந்தத் தண்ணீரைக் கொட்டாதிருக்கும்படி சொல்ல‌ அப்படியே விட்டுவைத்தார். நான் அதில் எப்பொழுதாவது ரசம் வைப்பதுண்டு. சுவையாக‌ இருக்கும். இம்முறையும் அதற்காகத் தான் கேட்கிறேன் என்று நினைத்திருப்பார். 

முதலில் நீர்க்க‌ இருந்ததைப் பார்த்ததும், இது வேலை செய்யாது என்று தோன்றியது. இரவு தூங்கப் போகுமுன் பார்க்க‌ சற்று ஜெலி போல் ஆக‌ ஆரம்பித்திருந்தது. ஐஸ்க்யூப் தட்டில் நிரப்பி குளிரூட்டியில் வைத்துவிட்டுத் தூங்கிவிட்டேன். காணொளியில் சொல்லியிருந்தபடி என் தட்டுகளின் ஒவ்வொரு குழியும் ஒரு மேசைக்கரண்டி கொள்ளளவாக‌ இருந்தது வியப்பைத் தந்தது. இப்படித்தான் எல்லாக் குளிரூட்டித் தயாரிப்பாளர்களும் தயாரிப்பார்களோ! 

இன்றுதான் நேரம் அமைந்தது செயற்படுத்த‌. 'விப்ட் க்ரீம்' தயாரிப்பில் இறங்கினேன். வெள்ளையாகவே வராது என்று மனம் சொல்லிற்று. இருந்தாலும், பிழைத்துப் போனால் நான்கு கரண்டி சீனியும் கொஞ்சம் மின்சாரமும் கொஞ்ச‌ நேரமும் தானே வீண்! 

ஆனால் என் அவநம்பிக்கையைத் தகர்த்தபடி மெதுவே வெள்ளைவெளேரென நுரைத்து எழுந்தது க்ரீம். சுவையும் பறவாயில்லை. (க்றிஸ் ஒரு பொழுதும் நன்றாக இருக்கிறது என்று சொல்ல மாட்டார். அவரது அகராதியில், 'பறவாயில்லை,' என்றால் நன்றாக இருக்கிறது என்று பொருள்.) என் சின்னவர் ஒரு முறை விழுந்து எழுந்து அழுதார். 'பறவாயில்லை கண்ணா, அழாதைங்கோ!' என்றதும் கோபம் வந்தது. பிறகு, 'பறவாய் இருக்கு,' என்று அழ ஆரம்பித்துவிட்டார். (பரவாயில்லை! பரவாயில்லை! எது சரி!! உதித் பாடுவது போல் பருவாயில்லை என்று சொல்லாதவரைக்கும் சரிதான்.)

ஏணியை இழுத்து வந்து ஏறி பைப்பிங் பை & நொசில்ஸை எடுக்கப் பஞ்சியாக‌ இருந்தது. பிஸ்கட்டில் கரண்டியால் அள்ளி வைத்துச் சுவைத்தோம்.

மீதியைக் குளிரூட்டியில் வைத்திருக்கிறேன். கரைந்து போகுமா! அப்படியே இருக்குமா! கெட்டிப்படுமா! பார்க்கலாம்.  

நன்றி

அண்மையில் இமாவின் உலகில் புதிய உறவுகள் சிலர் இணைந்திருக்கிறீர்கள். அவர்களுக்கும் அவர்கள் இங்கு வரக் காரணமாக இருந்த நட்புக்களுக்கும் வலைச்சரத்திற்கும் VGK அண்ணாவுக்கும் என் அன்பு நன்றிகள்.

ஸ்டைலாக தளகுளி எடுத்து வைச்சிருக்கிறன் ஆளுக்கொன்று சாப்பிடுங்கோ. ;)

அறுசுவையும் நானும்

ஏற்கனவே  அறுசுவையில் உள்ள எனது படைப்புகளுக்கான தொடர்புகளை உலகில் அங்கங்கே இணைத்திருக்கிறேன்.
இப்போ புதிதாக...
'தொட்டுக்கொள்ள...'

~~~~~~~~~
தேவையான எல்லாவற்றையும் ஓரிடமாகத் தொகுத்து வைத்தால் தேடுவதற்குச் சுலபமாக இருக்கும் என்கிற எண்ணத்தில் இந்தத் தொகுப்பு. என்னைப் பின்தொடரும் கவினையில் ஆரவமுள்ள, தமிழ் படிக்கத் தெரியாத நட்புக்களுக்காக ஆங்கிலத்தில் சிலவற்றைக் கொடுத்திருக்கிறேன்.

Pumpkin carving
 Butternut Squash - 1
Butternut Squash - 2
Grape Tulips in Carrot Vase
Lily Pond
Mandarin Basket

 Decorated Food Cover

Wheat Bag
Paper Serviette Foldings - 1 
Paper Serviette Foldings - 2
Christmas Tissue Box
Christmas Crackers - part 1
Christmas Crackers - part 2

 Gift Box
Easy Scrap Book
Toy Houses
Wire-ribbon Angels - part 1
Wire-ribbon Angels - part 2

Plastic Eggshell Carving

2 in 1 Flowerpot Stand
Ladybird Pincushion 
Apron 
Paint Brush Holder 

Paper Giftbags
Shopping bag dispenser
 Bird Note Holder

False Pocket

Felt toy - Puppy

Felt Toy - Bunny

Felt Flower -Brooch

Hat Brooch
 Button Earstuds
Earring Stand
Kaurigum Pendant


Nail Art - white flowers on blue 
Nail Art - Lady Bug

Ceramic Painting (poinsetia on a mug) 

Number Plate
Coasters - Kolam

Birthday Greeting  -  1

Birthday Greeting - 2

Christmas Greeting 

Mirror Card for a girl
Golden Wedding Anniversary Invitation


Mini Flowerpot
Packing wire Flowers
Plastic Spoon Flowers  
 Raffia Flowers

Shopping Bag Flowers
Feltpen Flowers
Capsule Flowers
Putiputi
 Raupo Flower deco
Gumball Holy Sprigs

Candle - Creeper

Candle - Bunnies 

Igloo & Penguin - 1
 Igloo & Penguin - 2
 A Simple Macrame
 Flower Press
CD Mosaic vase
CD Coster Set & Basket

Record Vase
Four Vinyl Record Trays

Record Cake Tray
Record pen stand

என் எழுத்துகள் - இகழேல் ;)

உறவுகள்
சின்ன மனசுகள்
அன்புள்ள அப்பா
அப்பா!

என்ன செய்திருப்பேன்!
நடை 
மாட்டாயா!
சுட்டதும் சுடாததும்
வசந்தம் வருது
கல்லறை
ஆப்பிள்
~~~~~~~~~~~~~~~~~~~~~~~~~~~~~~~~~~~~~~~

க்றிஸ் கைவினைகள்

Trellis for a Potplant

Trough  -  part 1

Trough - part 2

 ~~~~~~~~~~~~~~~~~~~~~~~~~~~~~~~~~~~~~~

 ஏஞ்சல் செய்தவை

Beeswax Candles 

T- shirt Transfers
Lolly Lei 

~~~~~~~~~~~~~~~~~~~~~~~~~~~~~~~~~~~~~~~~~~
அம்மா செபா செய்தவை

Silver Bells
Flower Arrangement
Paper ducks - Origami / Papaer Serviette foldings
First communion crown
 ~~~~~~~~~~~~~~~~~~~~~~~~~~

என் சமையலறையிலிருந்து 

அறுசுவைக்குச் சென்ற என் குறிப்புகளுக்கான லிஸ்ட் 
+

அலனது சமையல்கள்

தக்காளி சாஸ்

பீஃப் காஸரோல் 

மைக்ரோ எள்ளுருண்டை

கொடுத்த வாக்கைக் காப்பாற்ற வேண்டாமா! ;)))

மகியின் ஆங்கில வலைப்பூவில் கொடுக்கப்பட்டிருந்த கருப்பு எள்ளுருண்டை குறிப்பின் கீழ், பாதிக்குப் பாதி வெள்ளை எள்ளும் கருப்பு எள்ளும் கலந்து செய்வதாகக் கருத்துச் சொல்லியிருந்தேன்.

இதற்கு முன் கருப்பு எள்ளு வாங்கியதில்லை. முதல் தடவையாக சாப்பிட்டிருக்கிறோம். வாங்கி வைத்தது இதிலும் தளகுளி நன்றாக வருமா என்பதை முயற்சிப்பதற்காக.

காற்கோப்பை கருப்பு எள், காற்கோப்பை  வெள்ளை எள் சேர்த்து வறுத்து....

4 மேசைக்கரண்டி அளவு சர்க்கரையை உடைத்துப் போட்டு ஆறவிட்ட எள்ளை அதனோடு சேர்த்து சுற்றி எடுத்தேன். சின்னதாகப் பிடிக்க முயன்றேன். இயலவில்லை. பத்து செக்கன் மைக்ரோவேவ் செய்து, கலந்து, மீண்டும் பத்து செக்கன் மைக்ரோவேவ் செய்து, கலந்துவிட்டு குட்டிக் குட்டியாக (பெரிய கோலி அளவு) 21 உருண்டைகள் பிடித்து வைத்தேன்.

படம் சுமார்தான், பொறுத்தருள்க. ;)

அடுத்த தடவை bring a plate for morning tea என்றால் பாடசாலைக்கு எடுத்துப் போகலாம். கட்லட்டும், கில் மீ டேட்ஸும், பட்டீஸும் எல்லோருக்கும் பிடித்திருந்தாலும் பழகி விட்டது. வித்தியாசமான உணவுப் பொருட்களை முயற்சித்துப் பார்க்க விரும்புபவர்கள் அவர்கள். இது சற்றுப் புதுமையாக இருக்கும். சுவை... நிச்சயம் அவர்களுக்குப் பிடிக்கும். எனக்கும் சிரமமில்லாத சமையல்.

மகியின் விதவிதமான எள்ளுருண்டை குறிப்புகள் இங்கே.

வாழ்த்துகிறேன்

இமாவுக்கு இனிய விநாயகசதுர்த்தி வாழ்த்துக்கள்.

பின்ன என்ன? எல்லாரும் கொழுக்கட்டையும் மோதகமுமாகப் போட்டுப் போட்டு என்னைப் புகைய வைக்கிறீங்கள். எனக்கு ஒருவரும் தாறதாக் காணேல்ல. ;(
நானே மோதகம் செய்து சாப்பிட்டன்.

இது உங்களுக்கு.

அனைவருக்கும்... பிலேட்டட் விநாயகசதுர்த்தி வாழ்த்துக்கள். :-)
~~~~~~~~~~~~~~~~~~~~~~~~
அதிராவுக்காக 0---   ---

ஒரு கேக்கின் டைரி 7

7ம் நாள் (08/08/2013)

 

இப்படி இருந்ததை...

 

 

கலக்கி ....

 

இப்படி....

- Herman the German Friendship Cake

ஒரு கேக்கின் டைரி 6

ஆறாம் நாள் (07/08/2013)

இப்படி இருந்ததை...

 

 கலக்கி விட....

இப்படி ஆனேன்.

- Herman the German Friendship Cake

ஒரு கேக்கின் டைரி 5

ஐந்தாம் நாள் (06/08/2013)

நன்கு கலக்கி... ஒரு பெரிய பாத்திரத்திற்கு மாற்றிவிட்டு...

 

உணவாக 1 கோப்பை மா, 1 கோப்பை சீனி, 1 கோப்பை பால் சேர்த்துக் கலக்கி துணியால் மூடினார்.

- Herman the German Friendship Cake

ஒரு கேக்கின் டைரி 4

நான்காம் நாள் (05/08/2013)

 

ஒருமுறை கலக்கி வைத்தார்.

- Herman the German Friendship Cake

ஒரு கேக்கின் டைரி 3

மூன்றாம் நாள் (04/08/2013)

ஒரு குறிப்போடு இமாவின் பங்கு இமாவிடம் வந்து சேர்ந்தது. அவர் தன் பங்குக்கு ஒரு முறை நன்கு கலக்கிவிட்டு துணியினால் மூடி சமையல் மேடையில் வைத்தார்.
குளிரூட்டியில் வைத்தால் இறந்துவிடுமாம். 

  

- Herman the German Friendship Cake

ஒரு கேக்கின் டைரி 2

இரண்டாம் நாள் (03/08/2013)

 

  

ஒருமுறை கலக்கி வைத்தார்.

- Herman the German Friendship Cake

ஒரு கேக்கின் டைரி

02/08/2013 -

இமாவின் மருமகள் பிறந்ததினம். அன்பளிப்பாக ஏற்கனவே இரண்டு கேக்குகள் கிடைத்திருந்ததால் பேக் செய்ய வைத்திருந்த கேக் மாவுக் கலவையை நான்காகப் பிரித்து ஒரு பங்கைத் தனக்கு வைத்துக்கொண்டு மீதி இரண்டையும் தோழிகளுக்கு அன்பளித்துவிட்டார்.

 

நான்காவது பங்கை இமாவுக்காக ஒரு டப்பாவில் எடுத்து வைத்தார்.

- Herman the German Friendship Cake

ஃபீஜோவா தயாரிப்புகள்

ஒரு வகையில் இரு வகைகளில் தொடர் பதிவு இது. ;))

1. என் வீட்டுத் தயாரிப்பு; ஃபீஜோவா வரிசையில் அடுத்து வருகிறது.
2. ஸாதிகாவின் கண்டுபிடியுங்கள்!! இடுகையையுடன் சிறிது தொடர்பு உள்ளது. 

இடுகையைத் தயார் செய்துவிட்டுப் பார்த்தால் ஸாதிகாவின் இடுகை வெளியாகி இருந்தது. ;) அவர்கள் பதில் சொல்லும் வரை என்னுடையதைப் பின்போட்டேன்.

ஃபீஜோவா ரோல் அப்

 

நன்கு கனிந்த ஃபீஜோவா பழங்களின் சதைப்பகுதியைச் சுரண்டி, சிறிது பழுப்புச்சீனி & கறுவாத்தூள் சேர்த்து 'லெதர் ரோல் அப்' ஆக்கி பாக்கட் செய்து வைத்திருக்கிறேன்.

வாழைப்பழம், ஆப்பிள் போலவே ஃபீஜோவாவும் காற்றுப் பட்டால் கறுத்துவிடும். அந்த நிறமும் சீனி, கறுவா நிறமும் சேர்ந்த நிறம் இது.

கலவையை டீஹைட்ரேட்டர் தட்டில் ஊற்றி, பிரிக்க முடியும் அளவு உலர்ந்ததும் பிரித்து, வெயில் கிடைத்த போது வெயிலிலும் மீதி அவணிலுமாக உலரவைத்தேன்.

'ரோல் அப்' இனிப்பும் புளிப்புமாக நன்றாக இருக்கிறது. இப்போ ஃபீஜோவா காலம் முடிந்துவிட்டாலும் என்னால் சுவைக்க முடிகிறது.
 

கடிக்கும் பதத்தில் இருந்த பழங்களில் வற்றல் போட்டேன். சுவையில் நேத்திரங்காய் சிப்ஸிற்கும் இதற்கும் பெரிதாக வித்தியாசம் இல்லை.

உயரமாய் இருக்கிறது; பயமாய் இருக்கிறேன்!

தேதி - 07/07/2013
இடம் - இமாவின் சமையலறை

செபா:-  பின் வீட்டுக் கூரையில என்ன? குரங்கா?

இமா:- பூனை அது. ;) ஏறீட்டு இறங்கத் தெரிய இல்ல. கொஞ்ச நேரமா உலாவுது. முஸ்பாத்தியா இருக்கு.
படம் எடுக்கலாம். கட்லட் பொரிக்க எண்ணெயை அடுப்பில வைச்சிருக்கிறன். மறந்தால் வீடு சரி. ஒரு செட் போட்டுவிட்டு பிறகு படம் எடுக்கப்போறன்.

செபா:- இதென்ன வால் இப்பிடி இருக்கு?
இமா:- ம். அது சீனத்துப் பூனை போல. காற்றும் வீசுது இப்ப.

பூனை:- இந்தச் சனம் என்னையே பார்க்குறாங்க. என்ன யோசனையோ தெரியாது. பிடிச்சுப் பொரிக்க முதல் கெதியா ஓடிரவேணும்.

மீதிக் கதை வேண்டுமானால்... இங்கே