கல் கால் கை

சேலையிலிருந்து உதிரும் கற்கள் - தரையைச் சுத்தம் செய்கையில் கண்ணில் பட்டால், கைவேலை செய்யலாம் பொறுக்கி வைப்பது உண்டு.

விளையாட்டாக, என்  காலில் ஓர் வேலை செய்தேன்.

அப்படியே கையிலும் ஒரு வேலை.

;)) கற்கள் பெரியவை. கொஞ்சம் இடைஞ்சலாக உணர்ந்ததால் மறுநாட்காலையே கையைச் சுத்தம் செய்ய வேண்டியதாயிற்று. ;(

பசைபூசி

அம்மா வீட்டுக் குளிரூட்டியில் குறிப்புகள் மாட்டி வைப்பதற்காக ஒட்டப்பட்டிருந்த 'க்ளிப்' உடைந்துவிட்டது. 

காந்தம் உள்ள பகுதி மீண்டும் எம் வீட்டுக் குளிரூட்டியில் ஒட்டப்பட்டுவிட்டது. சிறிய துண்டுகளை வீசிவிட்டேன்.

இரண்டாவது பிரதான பாகத்திற்கு அருமையான ஒரு உபயோகம் அமைந்தது. பெரிய பரப்புகளுக்கு பசை பூச நேரும் சமயம், எங்கிருந்தாவது ஒரு அட்டைத்துண்டை எடுத்துப் பயன்படுத்துவேன். இனி இந்தத் துண்டை நிரந்தரமாக அந்தத் தொழிலுக்காக வைத்துக் கொள்ளலாம். கைபிடி இருப்பதால் கவனியாமல் பசையில் விரல் படும் விபத்து நேராது. பசையும் சீராகப் பூசப்படும்.

வாடிப்போன சீடீ

இங்கு வந்த ஆரம்ப நாட்களில்... கைவினைகள் செய்வதற்கான பொருட்கள் எதுவுமே கையில் இல்லை. குட்டிக் கத்தரிக்கோல் ஒன்று சிறு தையல் வேலைகளுக்காக வைத்திருந்தேன். அட்டைப் பெட்டிகளையும் ப்ளாத்திக்குப் பால்போத்தல்களையும் வைத்து விளையாடிக்கொண்டிருப்பேன். 

அவை என் கைவினைப் பசிக்குத் தீனி போடப் போதவில்லை. வீட்டில் முதல் முதலாக வீணாகிப் போன சீடீ இது. சின்னவர்களிடம் 'க்ளூ' இருந்தது. கரை நீக்கிய வெள்ளைப் பாண் துண்டு ஒன்றைப் க்ளூ சேர்த்துப் பிசைந்து ரோஜாக்களையும் சில மொட்டுகளையும் இலைகளையும் உருவாக்கினேன். பிரகு சின்னவர்களது நீர்வர்ணங்களை இரவல் வாங்கிப் பூசிவிட்டேன். ஒரு வாரம் கழித்து, நகப்பூச்சின் மேல் இறுதியாகப் பூசும் மேற்பூச்சைப் பூசிக் காயவிட்டேன்.

சீடீயில் ஒட்டியபின் எங்கே எப்படி வைப்பதென்றே தெரியவில்லை.  வாடகை வீட்டில் ஆணி அடிக்க முடியாது. அப்போது இந்த நிறுத்தி இருக்கவில்லை. அங்கும் இங்குமாக இடம் மாற்றி வைத்து அழகுபார்த்தேன்.

வருடங்கள் கடந்தன. நான்காவது வீடு இது.

இலைகளும் காம்புகளும் உதிர்ந்தன; மொட்டுகள் காணாமற்போயின. 

படிந்த தூசைத் துடைத்தால் மீதியும் தொலையும் நிலையில் - எவர் பார்வையிலும் படாத ஓர் இடத்தில் சேமிப்பில் போட்டுவைத்தேன்.

இன்று... மீண்டும் ரசித்து ருசித்துவிட்டு... வீசினேன் குப்பைத்தொட்டியில். 

இமாவின் உலகில் உள்ள 'குப்பைத்தொட்டி' என்றும் நிரம்பாது; வெறுமையும் ஆகாது. பதிவிட்டால் எப்போது வேண்டுமானாலும் நான் இரைமீட்டுப் பார்க்கலாம்.

காப்பிக் கிண்ண அணிகலன்!

சில வருடங்கள் முன்பு, என் சிறு வயதுத் தோழி ஒருவர், காப்பிக் கிண்ணங்களில் (Espresso capsules) அழகழகாக அலங்கார வேலை செய்து பேஸ்புக்கில் பகிர்ந்திருந்தார்.

என் சின்ன மகன் வீட்டில் தான் முதல்முதலில் கிண்ணங்களை நேரடியாகக் கண்டேன். சேகரித்துத் தருமாறு கேட்டிருந்தேன்; கிடைத்தது.

கையில் கிடைத்தவற்றையெல்லாம் ஒட்டி அலங்கரித்தேன். பெரிதாய்த் திருப்தி கிடைக்கவில்லை. அவற்றைப் படம் எடுத்து வைக்கவில்லை. 

தொடர்ந்து வந்த நாட்களில் கூகுளில் தேட அருமையான கைவினைகள் கண்ணில் பட்டன. ஆரம்பத்தில் கிடைத்தவை எவையுமே ஆங்கிலத்தில் இருக்கவில்லை. வெறுமனே, 'படம் பார்; பாடம் படி,' என்கிற விதத்தில் புரிந்துகொண்டேன்.

என்னிடம் என் கைக்குப் பெரிதான பண்டோரா பிரேஸ்லட் ஒன்று இருந்தது. அவற்றுக்கான மணிகளை வாங்கலாம் என்று பார்த்தால், விலை வாங்க இடம் கொடுக்கவில்லை. இப்போது தான் யோசனை கிடைத்துவிட்டதே! நானே மணிகள் செய்து எடுத்தேன்.

செய்முறை பிறிதொரு சமயம் வெளியாகும்.

குப்பைத் தொட்டியில் குட்டி நிலவுகள்

அந்தி சாயும் போது நகம் வெட்டக் கூடாது என்பார்கள். அரையிருட்டில் பார்வை சரியாகத் தெரியாமல் ஆளமாக வெட்டிக் கொள்ளாமல் இருக்கட்டும் என்பதால் இப்படிச் சொல்வார்களோ!!

நகம் வெட்டும் போது சில சமயம், 'நீ வெட்டி வெட்டிப் போடும் நகத்திலெல்லாம், குட்டிக் குட்டி நிலவு தெரியுதடி,' என்கிற வரிகள் காதில் ஒலிக்கும். பிறகு அந்தக் குட்டிக் குட்டி நிலவுகளை வீச மனம் வருவது இல்லை. சின்னதாக எப்போதோ ஓர் கலியாண வீட்டில் கிடைத்த கேக் பெட்டியுள் போட்டு வைப்பேன்.

என்ன செய்வேன் என்கிற சிந்தனை எதுவும் இருந்ததில்லை. முட்டாள்தனமாக இதையெல்லாம் சேர்த்து வைக்கிறேன் என்று மனம் சிரித்தது. குட்டி நிலவுகளோடு கூட செயற்கை நகங்கள் சிலது.... சின்னவரது திருமணம் நடந்த காலத்தில்தான் அம்மா சுகவீனமாக இருந்தார்கள். என் வசதிக்காக நகங்களை அளவுக்கு வெட்டிப் பூசி வைத்திருந்தேன். தேவையான சமயம் ஒட்டிக் கொள்வேன். பிறகு சிலது தானாக விழுந்து தொலைந்துவிடும். சிலது எப்படி முயற்சி செய்தாலும் வராது. தொலையாமல் கழன்றவற்றையும் குட்டி நிலவுகளோடு போட்டு வைப்பேன்.

இன்று எல்லாவற்றையும் வீசப் போகிறேன். அதற்கு முன்...
நெய்ல் ஆர்ட்!!!

இறால்! சில காரணங்களால் படத்தைச் சரியாகத் திருப்பிப் போட முடியவில்லை.

இனி சந்தோஷமாக வீசலாம். ;-)

கண்ணான கண்ணே!

அப்பாவை கண் பரிசோதனைக்காக அழைத்துப் போன ஒரு சந்தர்ப்பத்தில் என் கண்ணில் பட்டது அங்கிருந்த இந்தக் கடதாசி. மறுபக்கத்தில் இருந்த
விபரங்கள் சுவாரசியமாக இருந்தன. இங்கே சேமித்து வைக்கப் போகிறேன்.

1. புதிதாய்ப் பிறந்த குழந்தைகள் அழும் போது கண்ணீர் சுரப்பதில்லை.

2. மனிதக் கண்கள் இரண்டு மில்லியனுக்கு மேற்பட்ட அசையக் கூடிய பகுதிகளால் ஆனது.

3. மனிதர் சிலர் பிறக்கும் போதே இரு வேறு நிறக் கண்களுடன் பிறக்கிறார்கள்.

4.  ஐன்ஸ்டைனின் கண்கள் நியூயோர்க் நகரில் ஓர் பத்திரமான இடத்தில் பெட்டி ஒன்றுள் சேமிக்கப்பட்டிருக்கிறது.

5. தங்கமீன்களுக்கு இமைகள் இல்லை.

6. ராட்சதக் கணவாய்களுக்கு கால்பந்து அளவு பெரிதாகக் கண்கள் வளருமாம்.

7. டொல்ஃபின்கள் ஒற்றைக் கண்ணைத் திறந்தபடி உறங்குமாம்.

8. பெரிய வெள்ளைச் சுறாக்கள் தம் இரைகளைத் தாக்கும் போது கண்களை பின்புறமாக தலைக்குள் உருட்டி வைத்துக் கொள்ளுமாம்.

9. சில பறவைகளால் அவற்றின் கண்கள் வழியே காந்தப் புலங்களைக் காண முடியுமாம்.

10. தீக்கோழியின் கண் அதன் மூளையை விடப் பெரிதாக இருக்குமாம்.

11. ஜாக்சன்ஸ் பச்சோந்திகள் தம் கண்களிரண்டையும் ஒரே சமயத்தில் வெவ்வேறு திசைகளில் அசைக்கக் கூடியனவாம்.

12. தேனீக்களுக்கு ஐந்து கண்கள் இருக்குமாம்.

தட்டி முடித்ததும் கடதாசியைக் குப்பைத் தொட்டியில் போட்டுவிட்டேன். அதனால் இது, 'குப்பைத் தொட்டி' என்னும் பிரிவின் கீழ் தெரியும். ;-)

வெயிலுக்கு முளைத்த‌ காளான்!

அவ்வப்போது கைவேலைக்காக‌ வாங்கிச் சேர்த்தவற்றில், சில செரமிக் பொருட்களை நேற்று வெளியே எடுத்தேன். யாருக்கு என்ன‌ அன்பளிப்பு என்பதை   யோசித்து குறித்து வைத்தாயிற்று. செரமிக் பெய்ன்ட் இருந்த‌ பெட்டியில் எப்பொழுதோ ஒரு கைவேலைக்காக‌ வாங்கி மீந்து போன‌ மலிவு விலை வர்ணங்கள் தெரிந்தன‌. சிவப்பும் வெள்ளையும் மஞ்சளும் பாதி காய்ந்து இருந்தன‌. 

வீசாமல் பயன்படுத்த‌ முடியாதா! 

~~~~~~~~~~~~~~~~~~~~~~~

2003ல் இந்த‌ வீட்டை வாங்கினோம். வாங்கும் போது ஒரு ப்ளம் மரம் & நிறைய‌ புல்லும் களைகளும் அவற்றின் நடுவே களையாக‌ வளர்ந்திருந்த‌ ப்ளம் கன்றுகளுமே இருந்தன‌. தோட்ட‌ வேலையை ஆரம்பித்தேன். 

அந்த‌ வருட‌ நத்தாருக்கு சின்னவர் எனக்கு அன்பளிப்பாகக் கொடுத்தது... ஒரு காளானை. $ கடைகள் சின்னவர்களுக்கு ஒரு பெரிய‌ வரப்பிரசாதம். :‍-) கையிலிருக்கும் சொற்பப் பணத்தில் அழகாக‌ எதையாவது தேடி வாங்கிவிடலாம். 

பல‌ வருடங்கள் கழித்து அதன் வர்ணப் பூச்சுகளை இழந்தும் என்னைப் பிரியாமல் செடி மறைவில் இருந்துவந்த காளானை, சுரேஜினியின் கைவேலை ஒன்று வெளியே எடுத்து வரச் செய்தது. படிந்த‌ பாசியைத் தேய்த்துத் தேய்த்துச் சுத்தம் செய்வது நச்சுப் பிடித்த‌ வேலையாக‌ இருந்தது.

இந்த‌ நிலை வரைதான் கொண்டுவர‌ முடிந்திருந்தது. அழுக்குப் போகாவிட்டாலும் சிரிப்புப் போகவில்லை. ;-) மீண்டும் அழுக்காகி விடாமல் ஒரு அட்டைப் பெட்டியில் உறங்கப் போய்விட்டார் காளான் பிள்ளையார்.

~~~~~~~~~~~~~~~~~~~~~~~~~~~~~~~~~~~~~~~~~~

தொட்டால் ‍ தூரிகையில் கெட்டித்தயிர் போல் ஒட்டிப் பிடித்தது தீந்தை. பளிச்! 

எங்கே என் காளான்! 

தேடிப் பிடித்தேன். 

பூசாமல் இழுபட்ட தீந்தை, காளான் மேல் கோடுகள் போன்ற‌ தோற்றத்தை ஏற்படுத்தியிருந்தது. காய்ந்த‌ பின் முகத்தை வரைந்தேன்.
 

அடிப்படை கரடுமுரடாக‌ இருந்ததால், மெல்லிய‌ கோடுகள் வரைவது சிரமமாக‌ இருந்தது.

மஞ்சள் பச்சக் பச்சக்! :‍) தூரிகையின் பின்புறத்தால் தொட்டு பொட்டுகள்வைத்தேன்.  பரவாயில்லை. 

கடும் வெயில் இங்கு.  சட்டென்று உலர்ந்துவிட்டது. என் தோட்டத்தில் எங்கே வைக்கலாம்!

                                     .. இந்தக் களைகளைத் தொலைக்க‌ முடியாமலிருக்கிறது. கர்ர். க்றிஸ்ஸிடம் சொல்லி தற்காலிகமாக‌ ஏதாவது விசிறச் சொல்ல‌ வேண்டும்.

 சின்னவர் ஓரிரண்டு நாட்களில் வருவார். நன்கு தெரியும் எனக்கு‍ ‍ காளானைப் பார்த்ததும் ஒரு சிரிப்புச் சிரிப்பார். ;-) அதன் கருத்து... "மம்மி இன்னும் சின்னப் பிள்ளை விளையாட்டு விளையாடுறா!"

அண்டாட்டிக்கா! ;)

part 1 - http://www.arusuvai.com/tamil/node/26973

part 2 - http://www.arusuvai.com/tamil/node/26974

குப்பைத் தொட்டியில் போடுமுன்னே....
ஒரு குழந்தை விளையாட்டு. ;)
அதை அறுசுவைக்கு அனுப்பி...
அழகு பார்த்து...
சந்தோஷமாகச் சின்னவர்களிடம் காட்ட - கேட்டார்கள்...

"அங்கின பனை மரமும் இருக்கோ மம்மி!!!" ;))))

Engraved Eggshell

வியாழன் - விடுமுறைநாள்.

முட்டை பெரிதாகப் பிடிக்காது, ஆனாலும் சாப்பிடலாம் என்று நினைத்தேன்.

உடைத்து, ஊற்றி, அடித்துப் பொரித்துச் சாப்பிட்டாயிற்று.

முட்டையோட்டில்... ட்ரிக்ஸி

முதல் முயற்சி; சும்மா ஒரு கிறுக்கல்தான்.

'நன்றாக இருக்கிறது.' என்கிற கருத்துக்கு மட்டுமே அனுமதி உண்டு. ;)

இதனை உடையாமல் பாதுகாப்பாக வைக்க ஒரு வழி பார்க்கவேண்டும்.

நியூஸிலாந்தில் உலகப் பிரசித்தி பெற்றது...

சென்ற இடுகையின் தொடர்ச்சியாக வருகிறது இது.

அது யூ ட்யூப் மூலம் கிடைத்தது.

இது என் சிந்தனையில் உதித்தது.

நான்கைந்து வருடங்களாக என் வளையல்களுக்கு அடைக்கலம் கொடுப்பவை இவைதான். பிரித்து வைக்கச் சுகமாக இருக்கிறது.

 

 L&P  - World Famous in New Zealand இந்த இணைப்பில் உள்ளவை 1970 - 1990 காலப்பகுதியில் பயன்பாட்டில் இருந்த போத்தல்கள். 

இது தற்போதையது.

 சுத்தம் செய்த போத்தல் ஒன்றின் அடிப்பாகத்தை.....

 

அதன் கடைசிக் கோட்டோடு கத்தரிக்கோலால் வெட்டிக்கொள்ள வேண்டும்.

 

இரண்டாவது போத்தலை வெட்டும் போது அதிலிருந்து ஒரு செ.மீ உயரமாக வைத்து வெட்டவேண்டும்.  கீழ்ப் பகுதியை மெதுவாக அழுத்திக் கொண்டு மூடிவிட்டால்  கச்சிதமாகப் பொருந்திக் கொள்ளும்.

இவற்றில் எனக்குப் பிடித்த முக்கிய விடயம் இவற்றை அழகாக  ஒன்றன் மேல் ஒன்றாக அடுக்கி வைக்கலாம் என்பது.

கூலா ஒரு கோலா

ஒரு தோழியும் நானுமாக யூ ட்யூபில் ஒரு முக்கிய ட்யூடோரியல் பார்த்து, இணையத்தில் தூய தமிழில் (புரியாவிட்டால் பரவாயில்லை. மீதியைத் தொடர்ந்து படியுங்க.) கருத்துப் பரிமாற்றம் செய்து கொண்டிருந்த வேளை.. . சுவாரசியமாக தொலைபேசியில் இருவர் பேசுகையில் cross talk வருவது போல் குறுக்கிட்டது இந்த ட்யூடோரியல்.

http://www.youtube.com/watch?NR=1&feature=endscreen&v=C91rreR1cgA

பேசிக் கொண்டே... அரைக் கண்ணால் பார்த்து வைத்தாலும், மனதை விட்டு அகல மறுத்து உள் மனதில் உட்கார்ந்திருந்திருக்கும் போல. 

நாளை குப்பை சேகரிப்பு நாள், அதற்கான ஆயத்தமாக வீட்டின் பின்னாலிருந்த பின்னை (bin) ;) முன்னால் உருட்டி வந்து வைக்கும் வேளை விழித்துக் கொண்டது மனது. "திறந்து பார்!" என்றது. திறந்தேன். உள்ளே மூன்று வெற்று கோக் போத்தல்கள்.

ஹ்ம்! காசா பணமா! ஒரு முறை முயற்சித்துப் பார்ப்போம் என்று முயன்றதில்...

காசு போட ஒரு டப்பா!!

ராதாராணி கொடுத்த விருதைக் கொண்டாட ஆளுக்கொரு மிட்டாயாவது கொடுக்காவிட்டால் எப்படி!

நீங்களே பிரித்து ஒன்றே ஒன்றை மட்டும் எடுத்துக் கொண்டு மீதியைக் கட்டி வைத்துவிட்டுச் செல்லுமாறு அன்புடன் வேண்டிக் கொள்கிறேன். நன்றி ராதா.

இது எனக்கு. ;)

மோட்டார் இல்லாத மோட்டார் வண்டி

Spring cleaning (தமிழாக்கம் !!) ;) தொடர்கிறது.

2008 ல் க்ரைஸ்ட்சர்ச் சென்றிருந்த சமயம் இந்த விமானச்சஞ்சிகை என்னோடு வந்திருக்க வேண்டும்.

குப்பையில் போடுமுன் உள்ளே எதாவது முக்கியமான கடதாசித் துண்டுகள் இருக்கிறதாவெனப் பார்க்க வேகமாக ஒரு முறை பக்கங்களை விசிறி, எறியப் போக... எதுவோ ஒன்று தடுக்க - மீண்டும் விசிறினேன். இந்தப் பக்கம் கண்ணில் பட்டது.

அதில் குறிப்பிட்டிருந்தபடி மடித்துச் சொருக இந்தக் குட்டி மோட்டார் வண்டி கிடைத்தது.

காலப்போக்கில் பிரிந்துவிடக் கூடும் என்று தோன்றியதால் முக்கியமான ஆறு இடங்களில் சின்னதாக 'செலோடேப்' போட்டுவைத்திருக்கிறேன்.

மியாவ்வ்!!

24/12/2011 - மதியம் கிறிஸ்மஸ் மரம் வைத்துக்கொண்டிருந்தோம். விருந்தினர் வந்தனர். அவர்கள் சென்றதும் தேநீர்க் கோப்பைகளை எடுத்து வைப்பதற்குள்... மேலே சாண்டலியரில் இருந்து ஒரு தூக்கணம் விழுந்து 3 துண்டாகிப் போனது சோசர். ;(

அழகாக உடைந்திருந்ததைத் தூக்கிப் போட மனதில்லை.

துண்டங்களைப் பொருத்திப் பார்க்க அதிரா தெரிந்தார். ;) செரமிக் பெய்ன்ட் கொண்டு வரைந்தாயிற்று.
பூனைக்கு எத்தனை மீசை!!
யாரும் பதில் சொல்லவில்லை. ;(
24 (12+12) என்று தெரியவந்தது; அதுவும் முகத்தை விட நீளமாக இருக்குமாம். அத்தனை வரைந்தால் அழகாக இராது என்று தோன்றிற்று. 3 சோடிகள் மட்டும் வரைந்தேன்.

செவிகளை இப்படி வைத்தால்!!

கடைசியில் hot glue கொண்டு இப்படி ஒட்டியாயிற்று. பொருத்தமாக stand ஒன்றும் கிடைத்தது.

"மியாவ்வ்!"

மியாவ் படம் கீறி வைத்தால் எலித்தொல்லை இராதாமே! உண்மையா!!!

கல்லூரிச் சிட்டுக்கள்

நாங்கள் ஊரில 'interval' எண்டுறத இங்க 'morning tea' எண்டுறாங்கள்; 'lunch interval' - 'afternoon tea' ஆகி இருக்கு. ஜெனி எப்பவும் 'recess' எண்டுவா; அவ 'Aussie'.
 
எங்கட 'department' நாற்சார் வீடு மாதிரி. நடுவில சின்னதா 'courtyard'... மூன்று 'bbq' மேசைகள், 'drinking fountain', 'worm bin' & 'dust bins' இருக்கு.
எங்களுக்கு 'morning tea' முடிய, இவைக்கு 'morning tea'.
'cup cake', 'pizza', 'pie' & 'sandwich' ஓரங்கள்... இப்படி விதம்விதமாகச் சாப்பிடுவார்கள்.

உள்ள ஒரு ஆள் தனிய இருந்து சாப்பிடுறா. இங்க வெளியில சண்டைக்கு ரெடியாகுகினம் இவை.
சண்டை நடக்கேக்க குறுக்கால ஒரு சின்னன் வந்ததில படம் சரிவரேல்ல. பிறகு இவங்கள் சமாதனமாகீட்டினம், எடுக்கக் இடைக்கேல்ல. இன்னொரு நாள் பாப்பம்.

உள்ள சாப்பிட்டுக்கொண்டிருந்தவ இவதான்; வண்டியைப் பாருங்கோ. ;)) 

"அடுத்த பாடத்துக்கு மணி அடிச்சுக் கேக்குது." 

எனக்குத் தெரிஞ்சு... ஒரு ஆறு வருஷமா இந்தச் செவ்வரத்தமரத்திலதான் இவை குடியிருக்கினம். உள்ள கூடு இருக்குது.

சிட்டுக்குப் பின்னால 'Just juice' போத்தலில இருக்கிறது 'worm tea'. செடிகளுக்கு விடுறதுக்கு எடுத்து வச்சிருக்கிறம்.
சிட்டு, தொட்டித் தட்டில சேருற தண்ணீரையே 'tea' எண்டு குடிச்சுரும்.

சலவை நடுவே ஒரு விளையாட்டு

செபா என்னை 'நவீன நாகம்மா' என்று கூப்பிடுவார். ;)

முன்பு எங்களால் முடியாத போது நாகம்மாதான் சலவையில் உதவுவார்.
அழகான சின்ன உருவம்; எப்போதும் சிரித்துக் கொண்டே இருப்பார். வெற்றிலை போடுவார்.

சின்னவர் பிறக்குமுன்பாக சின்னதாக ஒரு double loading சலவை இயந்திரம் வாங்கிக் கொண்டோம். அப்போது எனக்கு அமைந்த பெயர் இந்த 'நவீன நாகம்மா.'

இப்போதுள்ள வீட்டிற்கு வந்ததும் சின்னதாக ஒரு dryer வாங்கிக் கொண்டோம்.

அதிலிருக்கும் filter with lint

lamp shade! flying saucer!
அடிக்கடி இப்படி விளையாடுவேன்.

காயும் துணிகளைப் பொறுத்து விதம் விதமான நிறங்களில் இப்படித் தட்டுகள் கிடைக்கும்.

கத்தரிக்கோலால் ஒரு வெட்டு வெட்டி...
அப்படியே சுற்றிக் கொண்டு வந்து இதழ்களைச் சீராக்கினால் அழகான பூ.
வேண்டாம் - இது தூசு விளையாட்டு.

முன் கதையின்...

பின் கதைச் சுருக்கம்

!!!
 
+ H2O 
=
¦
\¦/

- kitchen flooring

+ 'imma'gination (tkz Narmatha)

=

¦
\¦/

+ ;-)