Showing posts with label Greeting Cards. Show all posts
Showing posts with label Greeting Cards. Show all posts

Tuesday, 26 May 2020

அனைத்தும் சுழலும்


காலச்சக்கரம் சுழலும்; மாதங்கள் மீண்டும் மீண்டும் வரும். ஒவ்வொரு பிறந்தநாளும் மாறிய ரசனைகள் கொண்டனவாக வந்து போகும். வாழ்த்திதழ்கள் வரும். சேகரித்துப் பத்திரப்படுத்தி அடிக்கடி எடுத்துப் பார்த்து இரைமீட்கலாம். 

என்னிடம் உள்ள வாழ்த்திதழ் ஒன்றில் எழுதப் பயன்படுத்தப்பட்ட மை என்ன காரணத்தாலோ மெதுவே மங்கிக் கொண்டு வருகிறது. அந்த வாழ்த்திதழின் வயது - குறைந்தது முப்பதாக ஆவது இருக்க வேண்டும். ஒரு திருமண அழைப்பிதழ் வைத்திருக்கிறேன். அதன் வயது பத்துப் பண்ணிரண்டு இருக்கலாம். கையில் கிடைத்த சமயம் அதன் அமைப்பை அத்தனை வியந்திருக்கிறேன். அதனால்தான் பத்திரப்படுத்தினேன் என்று கூடச் சொல்லலாம். கையால் தயாரித்த காகிதத்தில் அழகுப் பொன் நிற மையில் அழைப்பு அச்சிடப்பட்டிருந்தது. சமீபத்தில் எடுத்துப் பார்க்க, பெரும்பாலான விபரங்கள் மறைந்துவிட்டிருக்கின்றன. தேதி, மணமக்கள் பெயர் எதுவும் தெரியவில்லை. 

ஔவை பணத்தைப் புதைத்து வைப்பது பற்றிச் சொன்னது நினைவுக்கு வருகிறது. கூடுவிட்டு ஆவி போன பின் யாரே அனுபவிப்பார், பாவிகாள் என் சேகரிப்புகள்!! :-) 

இன்று பாடசாலையில் இருவருக்குப் பிறந்தநாள். அவர்கள் அனுபவிக்கட்டும் என்று உரு மாற்றினேன் இரண்டை. பெறுபவர்கள் மட்டுமல்லாமல், காண்பவர்களும் அனுபவிப்பார்கள் என்று நினைக்கிறேன். 

பழைய வாழ்த்திதழின் முகப்பை வெட்டி: சட்டத்தோடு, சட்டத்தினுள் பூக்கள் இலைகள் இல்லாத இடங்களையும் வெட்டி நீக்கினேன். (இரவு நேரம் எடுத்த காரணத்தால் படத்தில் விபரங்கள் தெளிவாகத் தெரியவில்லை.) இந்த அமைப்பை 3D ஸ்டிக்கர்கள் கொண்டு புதிய அழைப்பிதழின் முகப்பில் ஒட்டினேன். மணிகளைச் சேர்ப்பதை, சமீப காலத்தில் என் அனைத்து வாழ்த்திதழிலும் செய்துவருகிறேன். விரைவில் வேறு முறைக்கு மாற வேண்டும். :-)
இது மம்மிக்கு அவரது தோழி இலங்கையிலிருந்து அனுப்பிய வாழ்த்திதழிலிருந்து வெட்டி எடுத்தது. பூக்களின் நடுவில் வழமை போல், மணிகள். பூச்சாடியும் பூக்களும் 3D ஸ்டிக்கர்கள் உதவியோடு உயர்த்தி ஒட்டப்பட்டிருக்கின்றன.

Friday, 1 May 2020

கொரோனா காலத்துப் பிறந்தநாள்!


தோழி ஒருவரது பிறந்தநாள் இன்று. அருகில் உள்ள தபால் நிலையம் மூடி இருக்கிறது; தூரப் பயணத்திற்கு அனுமதி இல்லை; தபால்தலை வாங்க இயலாது. என்னிடம் ஏற்கனவே கட்டணம் செலுத்திய தபாலுறைகள் இருந்தன. அவற்றிலொன்றில் அடங்கக் கூடியதாக வாழ்த்திதழை அமைத்தேன். தினமும் இல்லையென்றாலும் தபால்சேவை இயங்குவது தெரிகிறது. நேரத்திற்கே தபாலில் சேர்த்தாயிற்று. கிடைத்திருக்கும் என நம்புகிறேன்.

பயன்படுத்தியவை & செய்முறை சுருக்கமாக:-

  • வெள்ளை அட்டையை அளவாக வெட்டி...
  • அதன் முன் பகுதியில் மட்டும் சாட்டின் கடதாசி ஒட்டினேன்.
  • சாட்டின் பூக்களை 3D sticky dots கொண்டு உயர்த்தி ஒட்டினேன்.
  • அணிய இயலாதிருந்த காதணிகள் இரண்டின் ஒற்றைகள் (குறட்டினால் தண்டுப் பகுதியை வெட்டி நீக்கினேன்.) இவற்றையும் உயர்த்தி ஒட்டியிருக்கிறேன்.
  • சிறிய வெள்ளை மணிகள். அட்டையில் பசையினால் பொட்டுகள் வைத்து, மணிகளை இடுக்கியின் உதவியால் எடுத்து அதன் மேல் வைத்துவிட்டால் ஒட்டிக் கொள்ளும்.
  • இறுதியாக மூலைகள் இரண்டையும் அலங்காரமாக வெட்டி விட்டேன்.

    தோழி தமிழர் அல்ல, இதைப் பார்க்க மாட்டார். இருந்தாலும்... இனிய பிறந்தநாள் வாழ்த்துக்கள் தோழி.

Thursday, 26 March 2020

Computer Birthday Card

கூட வேலை செய்யும் குட்டித் தோழி ஒருவருக்கு இன்று இருபத்தைந்தாவது பிறந்தநாள். இவர் உதவி இல்லாவிட்டால் இன்று திடீர் இணைய வழிக் கல்வி பற்றி தலை வால் புரியாமல் திண்டாடியிருப்பேன். 

இந்த வாழ்த்திதழின் நடுவே உள்ள வட்டம், எங்கள் பழைய கம்ப்யூட்டருக்கான 'டிஸ்க் க்ளீனர்'. மொத்தமாக மூன்று தட்டுகள் வைத்திருந்தேன். ஒன்று வாழ்த்திதழில்; மீதி இரண்டையும்... :-)

என் பேரக்குழந்தைகளுக்குக் காட்டவென்று சேமித்து வைத்திருக்கிறேன். :-)
  அவை வந்த உறை இது.
பழைய கம்ப்யூட்டர் பேப்பர் ஒன்றை....
....உள்ளே ஒட்டி அளவாக வெட்டினேன். 
வட்டத்தை ஒட்டிக் காய விட்டால்... பசை பூசிய இடம் தனியாகத் தெரிந்தது. அதை மறைக்க கொஞ்சம் தாராளமாகவே வேலைப்பாடுகள் தேவைப்பட்டன. :-) 

காம்புகள் - கொடி கட்டும் நைலான் கயிறு. அவற்றைப் பிரித்து சிறிய கொப்புகளையும் ஆக்கினேன்.
பெரிய ரோஜாக்கள் - முன்பு ஒரு சின்னவர் கொடுத்த 'வாலன்டைன்ஸ்டே' அட்டையிலிருந்தது
சிறிய ரோஜாக்கள் - curling ribbon
குட்டிப் பூக்கள் - ஃபெல்ட் கடதாசியை 'பஞ்ச்' கொண்டு வெட்டி எடுத்தேன். நடுவே நகப்பூச்சினால் சிறிய புள்ளிகள் வைத்திருந்தேன். அவற்றில் பெரும்பான்மை உறிஞ்சப்பட்டுவிட மீதி மட்டும் இருந்தது. அதுவும் ஒரு வித அழகாக இருந்தது.
வண்ணத்துப் பூச்சி - அம்மாவின் சேகரிப்பில் கிடைத்தது. பக்கத்து வீட்டுச் சின்னப் பெண்களின் உடைந்த க்ளிப் ஒன்றிலிருந்து கிடைத்திருக்கலாம்.
Happy Birthday - confetti
பெயர் - எழுத்து மணிகள். L கிடைக்கவில்லை. சின்ன l எழுத்தை ஒட்டிவிட்டு மீதியை வரைந்துவிட்டேன்.
அதன் கீழ் உள்ள 'bow' - என் பழைய ஒற்றைத் தோடு. தண்டுப் பகுதியைக் குறட்டால் நறுக்கி எடுத்தேன்.
மீதி... குட்டிக்குட்டி சிவப்பு மணிகள் & சிவப்பு மகரந்தங்கள்.

இது தோழியின் கையில் கிடைத்திருக்குமா என்பது சந்தேகம். கடந்த ஞாயிறு இரவே இந்த வாரம் பாடசாலை நடக்குமா என்பது கேள்விக்குறியாகி இருந்தது, திங்கள் நான் பாடசாலையை எட்டிப் பார்த்ததற்கு இந்த வாழ்த்திதழைச் சேர்ப்பிக்கும் எண்ணமும் ஒரு காரணம். கிளம்பும் முன் என் செய்தியைப் பதிவு செய்துவிட்டேன். எங்கள் பகுதியைச் சேர்ந்த அனைவருக்கும், வாழ்த்திதழில் அவர்கள் வாழ்த்தினைப் பதிவு செய்யுமாறு கூறி மின்னஞ்சலில் தகவல் அனுப்பினேன். மறுநாள் ஒரு சிலர் மட்டும் அவசியம் கருதி பாடசாலைக்குச் சென்றிருந்தனர். அதன் பின் அனைவரும் வீட்டிலிருக்கிறோம். எம் பகுதித் தலைவருக்கு நேரம் கிடைத்து தபாலில் சேர்க்கத் தோன்றி நேரமும் கிடைத்திருந்தால் இன்று தோழி கையில் இந்த வாழ்த்திதழ் கிடைத்திருக்கும். அல்லாவிட்டால் என்று கொரோனா பயம் நீங்கி பாடசாலை திறக்கிறதோ அன்று ஒரு குட்டிப் பார்ட்டி வைத்து கையிலேயே கொடுப்போம். :-)

Tuesday, 24 March 2020

புதியதும் பழையதும்

வெகு காலமாக மனதில் இருந்த ஆசை; சமீபத்தில் அதிக தையல்கள் தைக்கக் கூடிய தையல் இயந்திரம் ஒன்று வாங்கினேன். பழையதில் எந்தக் குறையும் இல்லை. இன்றும் என் பிரியத்துக்குரியதாகவே இருக்கிறது. 'ஸ்காலப்ஸ்' தைக்கும் வசதி இருக்கவில்லை. இம்முறை வாங்கியதில் துவிச்சக்கரவண்டி கூடத் தைக்கலாம்.

பெட்டியைப் பிரித்து இயந்திரத்தை வெளியே எடுத்து வைத்தேன். அடிப்படை அமைப்புகள் சிலவற்றில் மாற்றங்கள் தெரிந்தது. புத்தகத்தை எடுத்துப் படித்து, நூலைக் கோர்த்து வைத்தேன்.

முதல் முயற்சிக்காக கைக்கு அகப்பட்டது குப்பைக்குப் போக இருந்த பழைய 'பானர்' ஒன்று. 'ஸ்காலப்ஸ்' தைக்கக் கிடைத்த சந்தோஷத்தில், செவ்வகவடிவில் இருந்த அந்த 'ஃபெல்ட்' துணியைச் சுற்றிலும் ஒரு வரி தைத்தேன். சிறிய வயதில் என்னிடம் இருந்த சட்டை ஒன்றில் நெளிவேலைப்பாட்டுத் தையல் ஒன்று இருந்தது. அது சங்கிலித் தையலில் இருக்கும்; இப்போதையது நேர்த்தையலையே நெளிவாகப் போட்டுக் கொடுத்தது. அதோடு பரீட்சார்த்தம் திருப்தியாக முடிந்தது.

இப்போது அந்தத் துணி வீச இயலாத அளவு அழகாகத் தெரிந்தது. பதினைந்து தடவையாவது எடுத்துப் பார்த்திருப்பேன். :-) 'இதை வைத்து என்ன செய்யலாம்!!!'

அந்தச் சமயம் தோழி ஒருவரது பிறந்தநாள் வந்தது. துணியைத் தேவையான அளவு மடித்து வெட்டிக் கொண்டேன். சுற்றிலும் சாதாரண தையல் ஒரு வரி அடித்தேன். அளவாக அட்டையை மடித்து துணியை அதில் ஒட்டிக் காயவிட்டேன்.

சில வருடங்கள் முன்பு வீட்டிற்குத் திரைச் சீலைகள் மாற்றும் சமயம் வெட்டிக் கழித்த லேஸ் துண்டு ஒன்று இருந்தது. கடையில் கோணலாக வெட்டிக் கொடுத்ததால் நான் நேராக வெட்டியதில் கிடைத்த அந்தத் துணியில் பத்துப் பன்னிரண்டு பூக்கள் முழுமையானவையாக இருந்தன. அரைகுறையாக இருந்த பூக்களை இலைகளாகவும் மொட்டுகளாகவும் மாற்றிவிடலாம் என்று தோன்றிற்று.

அட்டையில் விதம்விதமாக ஒழுங்குபடுத்திப் பார்த்து திருப்தியான அமைப்புக் கிடைத்ததும், ஒட்டினேன். குட்டிகுட்டி வெள்ளை மணிகளை ஒட்டி மேலும் அழகு சேர்த்தேன். பெற்றுக் கொண்டவர், 'இப்படி எல்லாம் கூட யோசிக்க வருமா!' என்றார். :-) அவரது வேலை மேசையில் மேல் உள்ள 'நோட்டிஸ் போர்டில்' குத்தியிருக்கிறார்.

Friday, 1 November 2019

நத்தார் வருகிறது

நான் முன்பு கற்பித்த பாடசாலையிலிருந்து விலகிய சில நட்புகள் ஆறு மாதங்களுக்கு ஒரு முறை தோழி ஒருவர் வீட்டில் சந்திப்போம். ஆளுக்கொரு உணவுப் பண்டம் எடுத்துப் போவோம். பெரும்பாலும் என்னிடம் விரும்பிக் கேட்பது என் 'கட்லட்'. ஒருவர் பப்படம் கூடக் கேட்பார். :-) அதை எப்படிச் சமைப்பது, சமைக்கும் முன் பார்க்க எப்படி இருக்கும் என்பதெல்லாம் அறியாதவர் அவர். 

இதைத் தட்டும் சமயம் அம்மா சொன்ன அவரது தோழியின் கதை நினைவுக்கு வருகிறது. பப்படம் பொரிக்கச் சொல்ல, அதைக் கழுவி வடியவிட்டுப் பொரித்தாராம். ;D 

இப்போது படம் சொல்லும் கதைக்கு வருவோம். 2016 ஆரம்பத்தில் அப்பியாசப் புத்தகங்கள், பாடசாலைக்கான பொருட்கள் எல்லாம் மலிவு விலையில் விற்பனைக்கிருக்கும் சமயம் குட்டிக் குட்டி 'நோட் புக்' ஆறு சதம் விலை போட்டிருந்தார்கள். பாடசாலைக் கைவேலைக்கு உதவும் என்று கொஞ்சம் வாங்கியிருந்தேன். பயன்படுத்தியது போக நான்கைந்து மீதி இருந்திருக்கும். அம்மாவின் மரணத்தின் பின் அவரது பொருட்கள் மத்தியில் நிறையக் கிடைத்தன. 

என்ன செய்வது? எந்த வழியும் புலப்படவில்லை. ஒவ்வொரு வருடமும் என் பயன்பாட்டுக்கு ஒன்று மட்டும் எடுத்துக் கொள்வேன். அந்த ரீதியில் போனால் எனக்கு 80 வயதாகும் வரை பயன்படுத்தலாம். ;) அத்தனை இருந்தன. 

கார்த்திகை வர, மின்னஞ்சல் வந்தது எங்கள் ஆசிரியர் சந்திப்புப் பற்றி. ஆளுக்கு ஒரு சின்ன அன்பளிப்பு கொடுப்பதானால் என்ன கொடுக்கலாம்! பெற்றுக் கொள்பவருக்கு, எனக்கு எதையும் எடுத்து வரவில்லை என்கிற சங்கடம் வரக் கூடாது. அதனால் அன்பளிப்பு சின்னதாக இருக்க வேண்டும். அதே சமயம் பயனுள்ளதாகவும் அழகாகவும் இருக்க வேண்டும் என்று யோசித்தபடியே அதையும் இதையும் கிளற... கண்ணில் பட்டது என் பழைய வாழ்த்திதழ் சேகரிப்பு.

செயலில் இறங்கினேன்.

ஒரு பக்கம் எழுதிய வெள்ளை அட்டைகளை நடுவில் (இரும்பு அடிமட்டம் & ஸ்கோரர் பயன்படுத்தி) அழுத்தி மடித்துக் கொண்டேன்.
அவற்றைக் கொப்பிகளின் அட்டைகள் மேல் ஒட்டினேன். 
காய்ந்த பின் மேலதிகமான அட்டைகளை வெட்டி நீக்கினேன்.
வாழ்த்திதழ்களிலிருந்து அளவான படங்களையும் வாழ்த்து வாசகங்களையும் வெட்டிக் கொண்டேன்.
படங்களை முன் அட்டையின் வெளிப் பக்கமும் வாசங்களை அதன் உட்பக்கமும் ஒட்டிவிட்டேன்.
வாழ்த்திதழ்களில் எழுதுவது போல கையொப்பமிட்டேன்.
சின்னதாக ஒரு ரிபன் 
கட்டியதும் அன்பளிப்புகள் தயாராகிவிட்டன.
அனைத்தையும் ஒரு பையில் (நினைவாக தேவைக்கு மேல் சிலது எடுத்துக் கொண்டேன். எதிர்பாராது யாராவது வந்திருந்தால் சிக்கலாகிப் போகுமல்லவா?) போட்டு எடுத்துச் சென்றேன். விருந்து முடிந்து பிரியும் சமயம், 'லக்கி டிப்' போல ஆளுக்கு ஒன்று எடுத்துக் கொள்ளக் கொடுத்தேன். நத்தார் காலத்திற்கான குறிப்புகளைக் குறித்து வைத்தால் மறு வருடம் கூட தேவைக்கு எடுத்துப் பார்க்கலாம். 

எல்லோருக்கும் அன்பளிப்பு பிடித்திருந்தது. இம்முறை தற்போதையை பாடசாலை நட்புகளுக்காகச் செய்ய இருக்கிறேன். 

என் சேகரிப்பும் மெதுவே பயனுள்ள விதத்தில் குறைந்து வருவதைப் பார்க்கச் சந்தோஷமாக இருக்கிறது.

Thursday, 12 September 2019

சட்டத்துள் பூக்கூடை

முக்கியமான ஒரு உறவினருக்கு இன்று பிறந்தநாள். அவருக்கு என் அன்பு வாழ்த்துக்கள். காலம் எத்தனை வேகமாக ஓடுகிறது! சின்னக் குழந்தையாகப் பார்த்தவருக்கு இன்று __ வயது! :-)

வாழ்த்திதழுக்கான உத்திகள் ஏற்கனவே பயன்படுத்தியவை தான். புதிதான விடயம் - புகைப்படத்தில் தெரியாது - முப்பரிமாணத் தோற்றம் ஒன்று கொடுத்திருக்கிறேன். பூக்களையும் இலைகளையும் தட்டையாக ஒட்டாமல் தூக்கலாகத் தெரியும்படி ஒட்டினேன். அவை தபாலில் பயணப்படும் போது அமர்ந்து போகாமல் இருக்க வேண்டுமே! 
ரோஜா நிற அட்டையின் உட்புறம் OHP தாள் ஒன்றை வெட்டி ஒட்டிவிட்டு 0.3 சென்டிமீட்டர் உயரத்திலான ஃபோம் துண்டுகளை ஒட்டி வாழ்த்திதழில் இணைத்திருக்கிறேன்.
புகைப்படத்தில் 
வெளியே சிவப்பாகத் தெரிவது கடிதஉறை மட்டுமே. :-) 

Friday, 23 August 2019

மூன்று மெழுகுவர்த்திகள்


இன்று எங்கிருந்தோ கண்முன்னே வந்து குதித்தது இந்தப் படம். செய்தது எப்போது என்பது நினைவில் இல்லை ஆனால் யாருக்காகச் செய்தேன் என்பது நினைவிருக்கிறது. பல வருடங்களின் முன்பு செபாவின் பக்கத்து வீட்டுச் சிறுமிகளில் ஒருவர் - அனிக்கா அல்லது அனன்யாவின் மூன்றாவது பிறந்தநாளுக்காகச் செய்து கொடுத்தேன்.

கரை - எனக்கு மிகவும் பிடித்த செப்பு வர்ணத்திலான ஸ்டிக்கர்.
கேக் - corrugated அட்டை
மெழுகுவர்த்திகள் - கையில் அகப்பட்டகடதாசி எதுவோ

சுடர் - உண்மையில் புகைப்படத்தில் இருக்கவில்லை. வேலை முடியும் முன்பே புகைப்படம் எடுத்திருப்பேன். பெரும்பாலும் வேலை முடிந்த சந்தோஷத்தில் அனுப்பும் முன் புகைப்படம் எடுப்பது மறந்து போகும். பிறகு வரைந்திருக்கிறேன்.

மூத்த பெண்ணின் முதலாவது பிறந்தநாளுக்கும் ஒன்று செய்திருந்தேன். அது சின்னச் சின்ன விளையாட்டுப் பொருட்கள் அமைப்பில் ஆன பொத்தான்களை ஒட்டிச் செய்தது. பின்பக்கம் இருக்கும் வளையங்களை குறட்டினால் வெட்டி நீக்கி இருந்தேன். அப்போது என் கையில் இருந்தது ஃபில்ம் ரோல் போடும் கமரா. முக்கியமான நிகழ்வுகளைத் தவிர வேறு எதையும் படம் எடுத்து வைக்க நினைத்திராத காலம் அது.



Wednesday, 21 August 2019

தொட்டிச் செடிகள்

ஒரே நாளில் இருவருக்குப் பிறந்தநாள் வருடத்தில் மூன்று முறை எங்கள் பகுதியில் (வேலையில்) வரும். என்னோடு பிறந்தநாள் கொண்டாடுபவர் ஒருவரும் இருக்கிறார்.

சற்று நேரம் குறைவாக இருந்த சமயம் இருவருக்காகச் செய்தவை இங்குள்ளவை இரண்டும்.

கூடைகள் - http://imaasworld.blogspot.com/2019/08/blog-post_13.html ல் பயன்படுத்திய மிட்டாய்ப் பெட்டியின் மீதியை ஒரு அட்டையின் மேல் ஒட்டியிருக்கிறேன். 3D ஸ்டிக்கர் வைத்து உயர்த்தினேன்.
இலைகள் - கடதாசி
பூக்கள் - குட்டி பஞ்ச் பயன்படுத்தி வெட்டி எடுத்து, நடுவே மை இல்லாத பேனையால் அழுத்திவிட்டு கொத்தாக வரும் விதமாக ஒட்டியிருக்கிறேன்.
கரை & எழுத்துகள் - ஸ்டிக்கர்

Tuesday, 20 August 2019

வெள்ளை மலர்கள்

மீண்டும் ட்ரலிஸ் வேலை ஒன்று செய்தேன். இம்முறை மெல்லிய தீரைகளாக வெட்டியிருக்கிறேன்.

A4 அட்டை ஒன்றை மூன்றாக மடித்து, நடுப் பகுதியின் உட்புறம் தீரைகளை ஒட்டி, அதன் மேல் ஒரு வெள்ளை நிற அட்டையை ஒட்டி, முன் பக்கம் இருந்த அட்டையை மடித்து வெள்ளை அட்டையை மறத்து ஒட்டினேன். பூக்கள் - ஒரு திருமண அழைப்பிதழை பஞ்ச் செய்து எடுத்தது. இலைகள் சாதாரண நிறக் கடதாசியில் பஞ்ச் செய்தேன்.

இந்த வேலி வேலை, பிடித்திருக்கிறது. அடிக்கடி செய்வேன் என்று நினைக்கிறேன். அடுத்த முறை பூக்களை மாற்றலாம் என்று இருக்கிறேன்.

Sunday, 18 August 2019

பூ வேலி


அட்டையில் கூடை பின்னி வாழ்த்திதழ் செய்திருக்கிறேன். ஒரு மாற்றத்திற்கு இம்முறை வேலி. 'ட்ரெலிஸ்' எனக்கு மிகவும் பிடிக்கும். அதில் கொடிகள் பற்றி, பூக்கும் போது அழகாக இருக்கும் அதுவும் 'ஸ்வீட் பீஸ்' பூத்திருந்தால் கொள்ளை அழகு.  

இம்முறை ஓர் மூலையில் பூக்கள் ஒட்டியிருக்கிறேன். எப்பொழுதாவது கொடி படர்ந்திருப்பது போல் ஒன்று செய்யவேண்டும்.

  • அட்டையை தேவையான அளவுக்கு இரண்டாக மடித்துக்கொள்ள வேண்டும்.
  • அட்டையின் நடுவே ஒரு செவ்வகம் வெட்டி நீக்க வேண்டும்.
  • அதை மெல்லிய தீரையாக வெட்டிக் கொள்ள வேண்டும்.
  • முன் அட்டையின் உட்புறம் அளவாக இடைவெளி விட்டு தீரைகளை ஒரே விதமாகச் சரித்து ஒட்ட வேண்டும். ஒட்டொய பின் மேலதிகமானதை வெட்டி விடலாம். முன்பே அளந்து வெட்டுவது சிரமம்; கால விரயமும் கூட.
  • ஒட்டியவற்றுக் குறுக்காக அதே அளவு இடைவெளியில், இம்முறை குறுக்குத் தீரைகளிலும் புள்ளிகளாக 'க்ளூ' வைத்து ஒட்டிவிட வேண்டும்.
  • வாழ்த்திதழின் அளவிலான ஓர் அட்டையை (நிறம் உங்கள் இஷ்டம்.) மேலே ஒட்டிவிட்டால் வெட்டியவை ஒட்டியவை அனைத்தும் மறைந்து போகும்.
  • பின் பக்க அட்டையில் வாழ்த்து அச்சடித்த கடதாசியை ஒட்டிக்கொள்ளலாம்.
  • இப்போது மூடிப் பிடித்து ஓரங்களை ஒன்றாக வெட்டி சீர் செய்ய வேண்டும்.
  • பூக்களை உங்களுக்குப் பிடித்தபடி ஒட்டிக் கொள்ளுங்கள்.

இந்த வாழ்த்திதழை எந்த நிகழ்வுக்காகவும் பயன்படுத்தலாம். பூக்கள் - வேறு வாழ்த்திதழ்களில் காணும் பூக்களை வெட்டிக் கூட ஒட்டிக் கொள்ளலாம். செய்வதற்கு வெகு சுலபம்; அழகுக்கும் அழகு.

இந்து யாருக்கு! என் மூத்த சம்பந்திக்கு. இன்னும் காலம் இருக்கிறது. அவர் தமிழரல்ல என்பதால் இங்கு வந்து பார்க்கமாட்டார் எனும் தைரியத்தில் இப்போதே பதிவிடுகிறேன். :-)

Saturday, 17 August 2019

சிவப்பு மலர்கள்

இன்னொரு வாழ்த்திதழ்.

இது சென்ற வாரம் என் மூத்த மருமகளுக்காகச் செய்தது.


பயன்படுத்தியவை

leather grain board
ஓரம் வெட்டுவதற்கு அலங்காரக் கத்தரிக்கோல்

கூடை - பாய் + ரிபன்
பூக்கள் - கோல்கேட் பற்பசைப் பெட்டி + பூ பஞ்ச் + நக அலங்காரத்தில் பயன்படும் கற்கள்.
இலைகள் - ஃபோம் ஷீட்

கரை & happy birthday - ஸ்டிக்கர்கள்


பல வருடங்கள் முன்பு வாசலில் வைத்திருந்த சப்பாத்து ராக்கையை மூடி வைக்க ஒரு தட்டி செய்வதற்காக பாய் ஒன்றைப் பயன்படுத்தினேன். மீதியாக இருந்த பாய்த்துண்டு என் சேமிப்பில் இருந்தது. இப்போது அதற்கு ஒரு பயன்பாடு வந்திருக்கிறது. அதன்
பின் பக்கம் கடதாசியை ஒட்டி, காய விட்டு கூடை வடிவில் வெட்டினேன். ஓரத்தில் இருந்த சின்னத் தீரைகள் விலகிப் போயின. அது தெரியாத வகையில் அலங்கரித்திருக்கிறேன். கூடையையும் சில பூக்களையும் பின்புறம் 3D ஸ்டிக்கர்கள் வைத்து ஒட்டியிருக்கிறேன்.

Friday, 16 August 2019

தாய்மை அடைய இருக்கும் தோழிக்கு

க்றிஸ்ஸின் மேலதிகாரிக்கு குழந்தை கிடைக்க இருக்கிறது. விடுமுறையில் செல்லும் முன் கொடுக்க ஒரு காட் வேண்டும் என்றார். அவருக்காகச் செய்தது இது.

வாழ்த்திதழ் செய்ய ஆரம்பித்த சமயம் குழந்தை ஆணா பெண்ணா என்று தெரிந்திருக்கவில்லை. அதனால் இரண்டு நிறங்களையும் சேர்த்துச் செய்திருக்கிறேன். இரண்டு நிறங்களிலும் ஒவ்வொரு முழு A4 அட்டைகள் பயன்படுத்தியிருக்கிறேன். ஒரு விதமாக மேலும் கீழுமாக ஒட்டி சில இஅடங்களை வெட்டி, மீதியான அட்டைத் துண்டுகளைத் தீரையாக வெட்டி, பின்னினாற்போல் வைத்து ஒட்டினேன். விளக்கப்படங்கள் இல்லாமல் விளக்குவது சிரமம் என்பதால் அந்த முயற்சியில் இறங்கவில்லை.

அடி மரம் - பொதி சுற்றி வந்த சணல்
பூக்கள் & இலைகள் -  அட்டையில் பஞ்ச் செய்து நடுவில் அழுத்தி எடுத்தது
கூடு - மூத்தவர் திருமணத்தின் போது கொடுத்த இனிப்புப் பெட்டி ஒன்றில் இருந்த ஒரு பக்கம் - உண்மையில் இரண்டு பக்கங்கள். ஒவோரு பக்கதிலும் ஒரு பெரிய குருவியும் ஒரு சிறிய குருவியும் இருந்தன. ஒன்றிலிருந்து சிறிய குருவியை வெட்டி நீக்கினேன். மறு பக்கம் திருப்பி வைத்து மற்றதன் மேல் கவனமாக ஒட்டிவிட இரண்டு பெரிய குருவிகளோடு ஒரு குஞ்சு இருப்பது போல் தெரிந்தது.
ரிப்பன் - ஏற்கனவே இனிப்புப் பெட்டியில் கட்டி இருந்த ரிபனிலிருந்து ஒரு துண்டு

Wednesday, 14 August 2019

நன்றி மறவாமல்...

திருமண அழைப்பிதழ் ஒன்றைச் சுற்றி ஒரு பாச்மண்ட் பேப்பர் வந்திருந்தது. அதில் பொன் நிறத்தில் குறுக்கும் நெடுக்குமாக நெளிந்த கோடுகள் அச்சிடப்பட்டிருந்தன. கடதாசியில் இருந்த இரு மடிப்புகள் வழியே வெட்டிப் பிரித்தேன்.

(படத்தில் பெயரை மறைக்க முயற்சி செய்தேன். முடியவில்லை.
அலுவலகம் ஒன்றிலிருந்து வீச இருந்த குப்பைகளிடையே அட்டைகள் சி(ப)லதை நண்பர் ஒருவர் என்னிஅம் அனுப்பி வைத்தார். அந்த அட்டையின் கீழ் ஓரத்தில் அகலமாக கருநீல நிறத்தில் ஒரு பட்டை இருந்தது.

பாச்மண்ட் கடதாசியில் அகலத்தைக் குறித்துக் கொண்டு அந்த இடத்தை மை தீர்ந்த குமிழ்முனைப் பேனா ஒன்றினால் அழுத்திக் கோடிட்டேன். (இப்படிச் செய்தால் அட்டை அழகாக மடிந்துகொள்ளும்.) மீதி சற்று நீளமாக இருந்தது. அதை வெட்டி நீக்குவதற்குப் பதில் பஞ்ச் கொண்டு பூக்கள் & இலைகள் வெட்டிவிட்டேன்.

பாச்மண்ட் கடதாசியை double sided tape வைத்து முன்புற அட்டையில் ஒட்டினேன். என் கணிப்பு தவறாகிப் போயிற்று. கருநீலப் பகுதியில் பாச்மண்ட் கடதாசியின் கீழ் டேப் தெரிந்து அழகைக் கெடுத்தது.

உள்ளே அளவிற்கு மடித்த வெள்ளைக் கடதாசியை வைத்து ஒட்டி, உலர்ந்த பின் ஓரங்களை வெட்டிக் கொண்டேன்.

டேப் அடையாளம் அழகைக் கெடுப்பதாகச் சொன்னேன் அல்லவா? அதை மறைக்க மெல்லிய ரிப்பன் (பெண்களின் மேற்சட்டைகளில் தோட்பட்டையின் உட்புறமாக மெல்லிய ரிப்பன் - கோட் ஹாங்கரில் மாட்ட வசதியாக என்று நினைக்கிறேன் - வைத்துத் தைத்திருப்பார்கள். எனக்கு அது இடைஞ்சலாகத் தெரிவதால் வாங்கியதுமே அவற்றை வெட்டி எடுத்து விடுவேன். அந்த வகையில் கிடைத்ததே இந்த வெள்ளை சாட்டின் பேபி ரிப்பன்.) இரண்டு வரிகள் ஒட்டினேன். அடையாளம் காணாமற்போயிற்று. ஒட்டும் போது அட்டையின் இருவக்கமும் நீண்டு இருக்கும்படி வைத்தே ஒட்டினேன். ஈரமாக இருக்கும் போது ரிப்பன் சீராக வெட்டுப்படாது என்பதால் காய விட்டு மறுநாள் காலை வெட்டிவிட்டேன்.
அடுத்து Thank You ஸ்டிக்கரை கோடுகளின் சரிவை ஒத்துப் போகும் விதமாக வைத்து ஒட்டினேன். எழுத்து அச்சடித்த (எழுத்துகளை மறைத்திருக்கிறேன்.) முத்துகளைச் சேகரித்து, மெல்லிய தீரையாக வெட்டிய கடதாசியில் கோர்த்து, கடதாசியைப் பின்பக்கமாக மடித்து, அதையும் double sided tape உதவியால் ஒட்டிக்கொண்டேன்.

அட்டை வெண்மையாகவும் ஓரம் கருநீலமாகவும் இருந்ததால், அந்த நிறங்களில் சின்னச் சின்னப் பூக்களைப் பஞ்ச் செய்து எடுத்தேன். ஒரு மௌஸ் பாடின் பின்பக்கம் வைத்து நடுவில் மை இல்லாத பேனாவை வைத்து அழுத்த, பூக்கள் குவிந்தாற்போல் வந்தன. நீலநிறப் பகுதியில் வெள்ளைப் பூக்களையும் வெண்மை நிறப் பகுதியில் நீலப் பூக்களையும், ஒன்றுவிட்டு ஒரு சதுரத்தில் வரும் விதமாக ஒட்டிக் கொண்டேன். ஓரங்களுக்கு அரைப் பூக்கள் தேவைப்பட்டன. ஒரு மூலைக்கு ஒரு காற்பகுதி வேண்டி இருந்தது. எழுத்துகளை ஒட்டி வரும் இடங்களில் ஒரு முக்கால்வாசிப் பூவும் கூடத் தேவையாக இருந்தது. வெட்டி ஒட்டினேன்.

உள்ளே நான் நன்றி சொல்வதற்கான காரணங்கள் அனைத்தையும் என் கைப்பட எழுதி (என் கையெழுத்தின் மேல் ஈர்ப்புக் கொண்டவர்களில் இந்தத் தோழியும் ஒருவர்.) கொடுத்துவிட்டேன். அவரைப் பொறுத்த வரை அவர் எனக்கு எதுவும் விசேடமாகச் செய்யவில்லை என்று நினைத்துக் கொண்டு இருக்கிறார். ஆனால் பல சந்தர்ப்பங்களில் அவர் லீவு கொடுக்க முடியாது என்று மறுத்திருந்தால் என் நிலை சிக்கலாகி உடைந்து போயிருப்பேன் என்பது நிச்சயம். ஒரு சமயம் பரீட்சை நாள் அன்று மருத்துவமனைக் கட்டிலிலிருந்து இருந்து செய்தி அனுப்பினேன். ஒரு நாள் அப்பா மருத்துவமனையில் என்று லீவு கேட்டேன். சென்ற வாரம் ட்ரிக்ஸிக்கு முடியவில்லை என்று லீவு. இங்கு பகிர்ந்து கொள்ள இயலாத சில நிகழ்வுகள் இவ்வருடம் நிகழ்ந்திருக்கின்றன. சிலவற்றை என் லீவுக் கணக்கில் சேர்க்கக் கேட்டேன்; மீதியை என் வேலை நாளாக இல்லாத நாட்களில் வேலை செய்து கழித்துக் கொள்வேன். நான் போகாத சமயம் எனக்குப் பிரதியாக வேறு யாரையாவது அனுப்பியே ஆக வேண்டிய கட்டாயம். என் வேலை அப்படி. லீவு சொல்லிவிடுவேன். மீதெல்லாம் தன் வேலைப் பளுவுக்கு நடுவே எந்த முணுமுணுப்பும் இல்லாமல் ஏற்பாடு செய்திருப்பார். நன்றி சொல்வதுதானே முறை!

Monday, 12 August 2019

Get Well Card

பாடசாலைத் தோழி ஒருவர் சிகிச்சைக்குப் போக இருக்கிறார். தொடர்ந்து இரண்டு வாரங்கள் படுக்கையில் இருக்க நேரும். அவர் கணவருக்கு சமைக்கத் தெரியாது. மூன்று குழந்தைகள் - இருவர் எம் பாடசாலையில் கற்கிறார்கள். இந்த இரு வாரங்களும் தினம் ஒருவர் என்னும் விதத்தில் எம் பகுதி ஆசிரியர்கள் இரவு உணவு சமைத்து எடுத்துப் போவதாக இருக்கிறோம். ஒரு திங்கட்கிழமையைச் சமையலுக்காகத் தெரிந்திருக்கிறேன். எம் குழு சார்பாக அனுப்புவதற்காக இந்த வாழ்த்திதழைச் செய்திருக்கிறேன்.

எழுத்து - பழைய வாழ்த்திதழ் ஒன்றிலிருந்து கிடைத்தது.
கரை - சிவப்பு நிற அட்டை ஒன்றை தீரையாக வெட்டி எடுத்தேன்.
பூ இருக்கும் சிவப்பு அட்டை - திருமண அழைப்பு ஒன்றின் எழுத்து இல்லாத பக்கத்திலிருந்து ஓர் துண்டு
பெரிய பூ - பழைய நகை ஒன்றிலிருந்து
சிறிய பூக்கள் - திருமண அழைப்பு, பற்பசைப் பெட்டி & நகங்களுக்கு ஒட்டும் நட்சந்திரங்கள்.
காம்பு - 'ஃபோம் ஷீட்'
இலைகள் - நெஸ்ப்ரஸோ கிண்ணங்கள்
இரண்டு அட்டைகளையும் பெரிய பூவையும் 3D 'ஸ்டிக்கர்கள்' கொண்டு ஒட்டியிருக்கிறேன்.